“நயினார் கொடுத்த கிரீன் சிக்னல்”…. அதிமுக கூட்டணியில் சீட் உறுதி?…. கொங்கு மண்டலத்தை அதிரவைக்கும் ‘லேடி சூப்பர் ஸ்டார்’….!

தமிழக சட்டமன்றத் தேர்தல் நெருங்கி வரும் வேளையில், அரசியல் களம் சூடுபிடிக்கத் தொடங்கியுள்ளது. இந்த சூழலில், மக்கள் நீதி மய்யம் கட்சியிலிருந்து விலகி பாரதிய ஜனதா கட்சியில் இணைந்த பிரபல கல்விப்பணி ஆர்வலர் அனுஷா ரவி, வரவிருக்கும் தேர்தலில் போட்டியிட விருப்பம் தெரிவித்துள்ளார். கோயம்புத்தூர் மற்றும் திருப்பூர் பகுதிகளில் பல்வேறு கல்வி நிறுவனங்களை நடத்தி வரும் இவர், தற்போது பாஜகவின் விளையாட்டுப் பிரிவு மாநிலச் செயலாளராகப் பொறுப்பு வகித்து வருகிறார்.

கடந்த 2021 சட்டமன்றத் தேர்தலில் திருப்பூர் தெற்கு தொகுதியில் மக்கள் நீதி மய்யம் சார்பில் போட்டியிட்ட அனுஷா ரவி, அங்கு கணிசமான வாக்குகளைப் பெற்றார். இருப்பினும், கமல்ஹாசனின் கட்சி செயல்பாடுகளில் ஏற்பட்ட அதிருப்தி காரணமாக அண்ணாமலை முன்னிலையில் பாஜகவில் இணைந்தார். தற்போது மீண்டும் அதே திருப்பூர் தெற்கு தொகுதி அல்லது கோயம்புத்தூரில் உள்ள ஏதேனும் ஒரு தொகுதியில் களம் காண அவர் ஆர்வம் காட்டி வருவதாகத் தகவல்கள் தெரிவிக்கின்றன.

தனது தேர்தல் விருப்பம் குறித்து பாஜகவின் மாநிலத் தலைவரிடம் அனுஷா ரவி ஆலோசித்துள்ளதாகவும், அதற்கு தலைமையிடம் இருந்து சாதகமான பதில் கிடைத்துள்ளதாகவும் கூறப்படுகிறது. குறிப்பாக, கொங்கு மண்டலத்தில் செல்வாக்கு மிக்க அதிமுக முன்னாள் அமைச்சர் எஸ்.பி. வேலுமணி உள்ளிட்ட கூட்டணித் தலைவர்களும் இவரது வேட்புமனுவுக்குப் பச்சைக்கொடி காட்டியுள்ளதாக அரசியல் வட்டாரங்கள் தெரிவிக்கின்றன. தேர்தல் செலவுகளைத் திறம்படக் கையாளும் திறன் கொண்டவர் என்பதால் கூட்டணித் தரப்பில் இவருக்கு ஆதரவு பெருகியுள்ளது.

தற்போது அதிமுக – பாஜக இடையே தொகுதிப் பங்கீடு குறித்த பேச்சுவார்த்தைகள் இறுதிக்கட்டத்தை எட்டியுள்ளன. கோவை, திருப்பூர் மற்றும் ஈரோடு உள்ளிட்ட மாவட்டங்களில் கூடுதல் இடங்களை பாஜக எதிர்பார்த்து வரும் நிலையில், அடுத்த சில நாட்களில் அதிகாரப்பூர்வ வேட்பாளர் பட்டியல் வெளியாகும் என எதிர்பார்க்கப்படுகிறது. அப்பட்டியலில் அனுஷா ரவியின் பெயர் இடம்பெறுவது கிட்டத்தட்ட உறுதி செய்யப்பட்டுள்ளதாகத் தெரிகிறது, இது கொங்கு மண்டல தேர்தல் களத்தில் கூடுதல் எதிர்பார்ப்பை ஏற்படுத்தியுள்ளது.