தமிழக அரசியல் களத்தில் புதிய அலையை உருவாக்கி வரும் முன்னாள் பாஜக மாநிலத் தலைவர் கே. அண்ணாமலையின் ‘வி தி லீடர்ஸ்’ (We The Leaders) இயக்கம், தற்போது அடுத்த கட்ட பாய்ச்சலுக்குத் தயாராகி வருகிறது. இதுவரை டிஜிட்டல் தளத்தில் மட்டுமே செயல்பட்டு, சுமார் 17 லட்சத்திற்கும் அதிகமானோரை உறுப்பினர்களாக ஈர்த்து சாதனை படைத்துள்ள இந்த இயக்கம், இனி கிராமப்புற மக்களை நேரடியாகச் சென்றடைய திட்டமிட்டுள்ளது. இதற்கான ‘நேரடி உறுப்பினர் சேர்க்கை’ (Physical Enrolment) குறித்த முக்கிய ஆலோசனைக் கூட்டம் மதுரையில் புதன்கிழமை நடைபெற்றது. இதில் அண்ணாமலையுடன் பாஜகவிலிருந்து விலகிய முன்னாள் மாநில மற்றும் மாவட்ட நிர்வாகிகள் பலர் கலந்துகொண்டு, இயக்கத்தை அடுத்த கட்டத்திற்கு கொண்டு செல்வது குறித்து தீவிரமாக விவாதித்தனர்.
நகர்ப்புறங்களில் ஸ்மார்ட்போன் மற்றும் இணைய வசதி காரணமாக டிஜிட்டல் பதிவு எளிதாக இருந்தாலும், கிராமப்புறங்களில் நிலவும் சவால்களை எதிர்கொள்ள புதிய உத்திகள் வகுக்கப்பட்டுள்ளன. ஆண்ட்ராய்டு மொபைல் இல்லாதவர்கள் மற்றும் ஆன்லைன் பதிவுகள் குறித்து விழிப்புணர்வு இல்லாத கிராம மக்களுக்கு உதவும் வகையில், ஒவ்வொரு கிராமத்திலும் தன்னார்வலர்களை களமிறக்க முடிவு செய்யப்பட்டுள்ளது. அங்கு தற்காலிக உதவி மையங்கள் (Help Centres) அமைக்கப்பட்டு நேரடி பதிவுகள் மேற்கொள்ளப்படும். இதுகுறித்து பேசிய முன்னாள் நிர்வாகி பழனி கனகராஜ், தொழில்நுட்பம் தெரியாத கிராம மக்களுக்கும் எங்கள் குழுவினர் நேரடியாக களத்தில் நின்று உதவி செய்வார்கள் என்று உறுதியளித்துள்ளார்.
மேலும், கிராமப்புற மக்கள் மிக எளிதாக இணையும் வகையில், தற்போதைய OTP முறைக்கு மாற்றாக ‘மிஸ்டு கால்’ (Missed Call) முறையை அறிமுகப்படுத்தவும் ஆலோசனை செய்யப்பட்டு வருகிறது. இதன் மூலம் சாதாரண மொபைல் போன் வைத்திருப்பவர்களும் ஒரு மிஸ்டு கால் மூலம் எளிதில் உறுப்பினராக முடியும். அதே நேரத்தில், உறுப்பினர் சேர்க்கையில் முறைகேடுகள் மற்றும் போலி பதிவுகளைத் தடுக்க கடுமையான நடவடிக்கைகள் எடுக்கப்படவுள்ளன. ஏற்கனவே OTP மூலம் பதிவானவர்கள் மிஸ்டு கால் முறையில் மீண்டும் பதிவு செய்ய முடியாது என்பதால், உறுப்பினர் எண்ணிக்கை மிகவும் துல்லியமாகவும், நம்பகத்தன்மையுடனும் பராமரிக்கப்படும் என இயக்கத்தின் நிர்வாகிகள் தெரிவித்துள்ளனர்.
அண்ணாமலை பாஜகவிலிருந்து விலகிய பிறகு, அமர் பிரசாத் ரெட்டி போன்ற முக்கிய முகங்கள் மற்றும் அவரது நெருங்கிய ஆதரவாளர்கள் பலரும் இந்த இயக்கத்தில் இணைந்து வருவது அரசியல் வட்டாரத்தில் பெரும் பரபரப்பை ஏற்படுத்தியுள்ளது. இந்த இயக்கம் வழக்கமான அரசியல் கட்சிகளைப் போல தேர்தல் பிரச்சாரத்தையோ அல்லது அதிகார லாபத்தையோ நோக்கமாகக் கொள்ளாமல், முழுக்க முழுக்க மக்கள் நலனை மட்டுமே இலக்காகக் கொண்டு செயல்படும் என்று அறிவிக்கப்பட்டுள்ளது. வரும் மாதங்களில் மாணவர்கள், விவசாயிகள் மற்றும் பெண்களின் முக்கிய பிரச்சனைகளை கையில் எடுத்து, மக்கள் இயக்கமாக இது களமிறங்கவுள்ளதால், தமிழக அரசியலில் இது ஒரு புதிய மாற்றத்தை ஏற்படுத்தும் என எதிர்பார்க்கப்படுகிறது.