“அதை உடனே திரும்பப் பெறுங்க”.. மத்திய அரசு போட்ட விபரீத உத்தரவு.. தமிழ்நாட்டு மாணவர்களுக்காக களத்தில் குதித்த அண்ணாமலை..!!

சிபிஎஸ்இ (CBSE) பள்ளிகளில் நடப்பு கல்வியாண்டிலிருந்தே ஒன்பதாம் வகுப்பு மாணவர்களுக்கு மூன்றாவது மொழியைக் கட்டாயமாக்கிப் புதிய அறிவிப்பு வெளியிடப்பட்டுள்ளது. இதற்குத் தமிழக பாஜக முன்னாள் தலைவர் அண்ணாமலை தனது கடுமையான எதிர்ப்பைப் பதிவு செய்துள்ளார். கடந்த 2026 ஏப்ரல் மாதம் சிபிஎஸ்இ அமைப்பு, ஆறாம் வகுப்பிலிருந்து மூன்று மொழிகள் கட்டாயம் என்றும், அதில் இரண்டு இந்திய மொழிகளாக இருக்க வேண்டும் என்றும் அறிவித்தபோது, இந்தியாவின் கலாச்சார பாரம்பரியத்தை மாணவர்கள் அறிய உதவும் என்பதால் அதைத் தான் வரவேற்றதாக அண்ணாமலை சுட்டிக்காட்டியுள்ளார்.

இருப்பினும், ஒன்பதாம் வகுப்பு மாணவர்களுக்கான இந்த மூன்றாவது மொழி கட்டாயமாக்கும் திட்டம், 2029-30 கல்வியாண்டிலிருந்து மட்டுமே அமல்படுத்தப்படும் என்று முந்தைய அறிவிப்பில் தெளிவாகக் கூறப்பட்டிருந்தது. ஆனால், அதற்கு மாறாகக் கடந்த மே 15, 2026 அன்று சிபிஎஸ்இ அனுப்பியுள்ள புதிய சுற்றறிக்கையில், நடப்புக் கல்வியாண்டான 2026 ஜூலை 1 முதலே இத்திட்டம் ஒன்பதாம் வகுப்பிற்கு அமலுக்கு வரும் எனத் தெரிவிக்கப்பட்டுள்ளது. சிபிஎஸ்இ அமைப்பின் இந்தத் திடீர் அதிரடி மாற்றம், தங்களின் முந்தைய அறிவிப்பையே அவர்களே மீறும் செயலாக அமைந்துள்ளது என்று அண்ணாமலை தனது அறிக்கையில் சாடியுள்ளார்.

இந்தத் திடீர் அறிவிப்பு பெற்றோர்களுக்கும், குறிப்பாகத் தமிழக மாணவர்களின் பெற்றோர்களுக்கும் பெரும் அதிர்ச்சியை ஏற்படுத்தியுள்ளது. மிகவும் குறுகிய காலத்திற்குள் ஒன்பதாம் வகுப்பு மாணவர்கள் மற்றுமொரு புதிய மொழியைக் கற்க வேண்டும் என்று கட்டாயப்படுத்துவது, குழந்தைகளுக்குத் தேவையற்ற மனஅழுத்தத்தை ஏற்படுத்தி அவர்களின் ஒட்டுமொத்த கல்வித் திறனையும் பாதிக்கும் என்று அண்ணாமலை கவலை தெரிவித்துள்ளார். எனவே, இந்த உத்தரவை மத்திய கல்வி அமைச்சகம் உடனடியாகத் திரும்பப் பெற வேண்டும் என்றும், முன்பே திட்டமிட்டபடி 2029-30 கல்வியாண்டில் இருந்தே இதனை அமல்படுத்த வேண்டும் என்றும் அவர் வலியுறுத்தியுள்ளார்.