அமெரிக்காவின் மேரிலாண்ட் உயிரியல் பூங்கா, வரும் காதலர் தினத்தை முன்னிட்டு “டாலர்ஸ் ஃபார் டங்” (Dollars for Dung) என்ற பெயரில் வினோதமான நிதி திரட்டும் அறிவிப்பு ஒன்றை வெளியிட்டுள்ளது. இதில் பங்கேற்க விரும்புவோர் சுமார் 5 டாலர் (ரூ. 453) செலுத்தினால், அங்குள்ள விலங்குகள் வெளியேற்றும் கழிவு ஒன்றிற்குத் தங்களுக்குப் பிடிக்காத ‘முன்னாள் காதலர்’ அல்லது ‘காதலி’யின் பெயரைச் சூட்டிக் கொள்ளலாம். இந்த வினோத பழிவாங்கல் நடவடிக்கையில் ஈடுபடுபவர்களுக்கு, அந்தப் பெயருடன் கூடிய டிஜிட்டல் சான்றிதழும் பூங்கா நிர்வாகத்தால் மின்னஞ்சல் வழியாக அனுப்பி வைக்கப்படும்.
இந்த வினோத அறிவிப்பு வெளியான சில நாட்களிலேயே, உலகம் முழுவதும் உள்ள 30-க்கும் மேற்பட்ட நாடுகளிலிருந்து ஏராளமானோர் ஆர்வத்துடன் விண்ணப்பித்து வருவதாகப் பூங்கா நிர்வாகம் நெகிழ்ச்சியுடன் தெரிவித்துள்ளது. இதன் மூலம் திரட்டப்படும் நிதியானது, பூங்காவில் உள்ள விலங்குகளின் பராமரிப்பு மற்றும் உணவுத் தேவைகளுக்காகப் பயன்படுத்தப்பட உள்ளது. காதலர் தினத்தில் பூங்காவிற்கு நிதி திரட்டவும், அதே சமயம் பிரிந்து சென்ற காதலர்களைக் கிண்டல் செய்யவும் உருவாக்கப்பட்ட இந்த ஐடியா தற்போது இணையத்தில் காட்டுத்தீயாய் பரவி வருகிறது.