“வார்னிங் கொடுத்தும் கேட்காத புள்ளிங்கோஸ்… நடுங்கிப்போன கிளாஸ்ரூம்… ஸ்டைல் காட்டிய மாணவர்களுக்கு… எஸ்ஐ முன்னிலையில் நடந்த… அலட்டல் இல்லாத ஹேர் கட்…!”

கடலூர் அரசு ஆண்கள் மேல்நிலைப் பள்ளியில் மாணவர்களிடையே ஒழுக்கத்தையும் முறையான தோற்றத்தையும் வலியுறுத்தும் வகையில் ஆசிரியர்களும் போலீசாரும் இணைந்து மேற்கொண்ட அதிரடி நடவடிக்கை அப்பகுதியில் பெரும் வரவேற்பைப் பெற்றுள்ளது. எப்போதுமே மாணவர்கள் பள்ளிக்கு சீருடை அணிந்து வருவதுடன், கண்ணியமான தோற்றத்துடனும் வர வேண்டும் என்பது விதியாகும். ஆனால், இப்பள்ளியில் பயிலும் சில மாணவர்கள் ஆசிரியர்களின் தொடர் அறிவுறுத்தல்களையும் மீறி, விதவிதமான சிகை அலங்காரங்களுடன் “புள்ளிங்கோ” பாணியில் பள்ளிக்கு வந்துள்ளனர். மாணவர்களின் இந்த அலட்சியப் போக்கைக் கண்டு பொறுமையிழந்த பள்ளித் தலைமை ஆசிரியை செந்தாமரை செல்வி மற்றும் ஆசிரியர்கள், மாணவர்களின் எதிர்கால நலன் கருதி ஒரு மாற்று வழியை யோசித்தனர்.

இந்த ஒழுங்கீனப் பிரச்சினைக்குத் தீர்வு காண, பள்ளி நிர்வாகம் நெடுஞ்சாலைத்துறை ரோந்துப் பிரிவு சப்-இன்ஸ்பெக்டர் திருமாவளவனின் உதவியை நாடியது. இதையடுத்து, சப்-இன்ஸ்பெக்டர் திருமாவளவன் முடிதிருத்தும் தொழிலாளர்களை நேரடியாகப் பள்ளிக்கே அழைத்து வந்தார். ஆசிரியர்களின் நேரடி கண்காணிப்பில், வகுப்பறையிலேயே வைத்து விதிகளுக்குப் புறம்பாக சிகை அலங்காரம் செய்திருந்த 100-க்கும் மேற்பட்ட மாணவர்களுக்கு ஒழுங்கான முறையில் முடி திருத்தம் செய்யப்பட்டது. முன்னதாக திருப்பத்தூர் மாவட்டம் நாட்றம்பள்ளி அரசுப் பள்ளியிலும் ஆசிரியர் பழனி என்பவர் இதேபோன்று சொந்த செலவில் மாணவர்களுக்கு முடி திருத்தம் செய்து சமூக ஊடகங்களில் பாராட்டுகளைப் பெற்றிருந்த நிலையில், தற்போது கடலூரிலும் இந்த அதிரடி நடவடிக்கை அரங்கேறியுள்ளது.

படிப்பைப்போலவே ஒழுக்கமும், கட்டுப்பாடான தோற்றமும் மாணவர்களின் எதிர்கால வளர்ச்சிக்கு மிகவும் முக்கியம் என்று கல்வியாளர்கள் கருதுகின்றனர். அந்த வகையில், கடலூர் பள்ளி ஆசிரியர்களும் காவல்துறையினரும் இணைந்து மேற்கொண்ட இந்த விழிப்புணர்வு முயற்சி, அப்பகுதி மக்களிடையே எக்கச்சக்கமான வரவேற்பைப் பெற்றுத் தந்துள்ளது. ஆசிரியர்களின் இந்த அதிரடி நடவடிக்கை தங்களது பிள்ளைகளை சரியான பாதையில் வழிநடத்த உதவும் என்று பெற்றோர்களும் மிகுந்த நம்பிக்கையுடனும் நெகிழ்ச்சியுடனும் பாராட்டு தெரிவித்து வருகின்றனர்.