ஈரானுக்கும் அமெரிக்காவிற்கும் இடையிலான போர் நிறுத்தம் ஒருவேளை முறிந்தால், ஈரானின் மூத்த இராணுவத் தளபதிகள் மற்றும் முக்கிய உள்கட்டமைப்புகளைக் குறிவைத்துத் தாக்க அமெரிக்கா ஒரு ரகசியக் ‘கொலைப்பட்டியலை’த் தயாரித்து வருவதாகத் தகவல்கள் கசிந்துள்ளன. குறிப்பாக, ஈரானின் உயர் தேசிய பாதுகாப்புக் குழுவில் முக்கியப் பங்காற்றும் IRGC தளபதி அஹ்மத் வாஹிதி அமெரிக்காவின் முதன்மை இலக்காக உள்ளதாகக் கூறப்படுகிறது. புதிய உயர்மட்டத் தலைவர் மொஜ்தபா கமேனி இன்னும் அதிகாரப்பூர்வமாகத் தோன்றாத நிலையில், வாஹிதி தலைமையிலான இந்தக் குழுவே தற்போது ஈரானைக் கட்டுப்படுத்தி வருவது குறிப்பிடத்தக்கது.
இராணுவ ரீதியாக, ஹார்முஸ் நீரிணையில் ஈரானின் ஆதிக்கத்தை முறியடிக்க அமெரிக்க பாதுகாப்பு அதிகாரிகள் தீவிரத் திட்டங்களை வகுத்து வருகின்றனர். ஈரானின் விரைவுத் தாக்குதல் படகுகள், கண்ணிவெடி வைக்கும் கப்பல்கள் மற்றும் எரிசக்தி நிலையங்கள் மீது தாக்குதல் நடத்த ஆலோசிக்கப்பட்டு வருகிறது. இருப்பினும், இத்தகைய தாக்குதல்கள் போரை மேலும் விரிவுபடுத்தி, உலகளாவிய கப்பல் போக்குவரத்தைப் பாதிக்கும் என்ற அச்சமும் அமெரிக்க அதிகாரிகள் மத்தியில் நிலவுகிறது.
ஏப்ரல் 13 முதல் ஈரானிய துறைமுகங்களுக்கு அமெரிக்கா முற்றுகையைத் தொடங்கியுள்ள நிலையில், இதுவரை 33 கப்பல்கள் திருப்பி அனுப்பப்பட்டுள்ளன. மேலும், பாரசீக வளைகுடாவிலிருந்து 2,000 மைல் தொலைவில் உள்ள இந்தியப் பெருங்கடல் வரை அமெரிக்கப் படைகள் தனது கண்காணிப்பை விரிவுபடுத்தி, மூன்று கப்பல்களை இடைமறித்துள்ளதாக பென்டகன் தெரிவித்துள்ளது. இந்தத் தொடர் நடவடிக்கைகள் மத்திய கிழக்கில் பெரும் பதற்றத்தை ஏற்படுத்தியுள்ளது.