அடப்பாவி இப்படியா பண்ணுவ?… இரவில் பைக்கை பறிமுதல் செய்த போலீஸ்… பதிலுக்கு போலீஸ் ஜிப்பை வீட்டிற்கு எடுத்துச் சென்ற போதை ஆசாமி…!

ஆந்திர மாநிலம் கர்நூல் மாவட்டத்தில் உள்ள ஆளூர் பகுதியை சேர்ந்த யுவராஜ் என்பவர் கடந்த புதன்கிழமை இரவு மது போதையில் வாகனம் ஓட்டி சென்றார். அப்போது அவரை கைது செய்த போலீசார் அவருடைய பைக்கை பறிமுதல் செய்தனர். இதனைத் தொடர்ந்து வெள்ளிக்கிழமை காலை போலீஸ் ஸ்டேஷனுக்கு சென்ற யுவராஜ் தன்னுடைய பைக்கை திருப்பித் தருமாறு கேட்டுள்ளார். ஆனால் விதிமுறைகளை காரணம் காட்டி போலீசார் அதற்கு மறுப்பு தெரிவித்துள்ளனர். இதனால் கோபமடைந்த யுவராஜ், என்னுடைய பைக்கை தராவிட்டால் உங்கள் போலீஸ் ஜிப்பை எடுத்துச் சென்று விடுவேன் என்று கூறியுள்ளார்.

அவர் மதுபோதையில் பேசுவதாக நினைத்த போலீசார் அதனை பெரிதாக எடுத்துக் கொள்ளவில்லை. ஆனால் யுவராஜ் சொல்லியது போலவே அங்கு நின்று கொண்டிருந்த போலீஸ் ஜீப்பை ஸ்டார்ட் செய்து, நேராக தன்னுடைய வீட்டுக்கே ஓட்டி சென்றுள்ளார். வீட்டுக்கு வந்த பிறகு மது போதையில் பேச முடியாத நிலையில் அவர் தள்ளாடி விழுந்தார். இதனை கவனித்த அவருடைய அண்ணன் உடனடியாக போலீஸ் வாகனத்தை காவல் நிலையத்திற்கு திருப்பிக் கொண்டு சென்று ஒப்படைத்தார். இதனைத் தொடர்ந்து போலீசார் யுவராஜ் மீது வழக்கு பதிவு செய்துள்ள நிலையில் அவரிடம் விசாரணை நடத்த உள்ளனர்.