திமுக – அதிமுக ரகசிய டீல்?… ஆதவ் அர்ஜுனாவை வெளுத்து வாங்கிய அதிமுக கொறடா…. தமிழக அரசியலில் புதிய ‘கோயபல்ஸ்’…!

தவெக அமைச்சர் ஆதவ் அர்ஜுனாவின் விமர்சனத்திற்குப் பதிலடி கொடுக்கும் வகையில், அதிமுக கொறடா அக்ரிகிருஷ்ண மூர்த்தி விடுத்துள்ள காரசாரமான அறிக்கை தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது. அதிமுக, திமுகவுடன் இணைந்து ஆட்சி அமைக்க முயன்றதாக ஆதவ் அர்ஜுனா குற்றம் சாட்டியிருந்த நிலையில், இந்த விமர்சனத்தை திட்டவட்டமாக மறுத்துள்ள அக்ரிகிருஷ்ண மூர்த்தி, சுயநலத்திற்காக இயக்கத்தைக் காட்டிக்கொடுப்பவர்கள் வரலாற்றுப் பிழை செய்வதாகச் சாடியுள்ளார்.

அவரது அறிக்கையில், ‘ஒரே பொய்யைத் திரும்பத் திரும்பச் சொன்னால் அது உண்மையாகிவிடும்’ என்ற கோயபல்ஸின் தத்துவத்தை தற்போதைய அரசியல்வாதிகள் சிலர் கையில் எடுத்துள்ளதாகக் குறிப்பிட்டுள்ளார். அஇஅதிமுக தொடங்கப்பட்ட காலத்திலிருந்தே எம்.ஜி.ஆர் மற்றும் ஜெயலலிதா ஆகிய ஆளுமைகள் பல சோதனைகளையும் தேர்தல் பின்னடைவுகளையும் சந்தித்துள்ளதாகக் கூறிய அவர், அப்போதெல்லாம் இயக்கத்தை விட்டுச் சென்றவர்கள் ஆளுங்கட்சியில் அடைக்கலம் புகுந்த வரலாற்றுப் பின்னணியையும் சுட்டிக்காட்டியுள்ளார்.

திமுக போன்ற தீய சக்திகளை ஒழிப்பதே அதிமுகவின் கொள்கை என்று குறிப்பிட்ட அவர், இல்லாத ஒரு குற்றச்சாட்டை அபாண்டமாக பொதுச்செயலாளர் எடப்பாடி பழனிசாமி மீது சுமத்துவதை ஒருபோதும் ஏற்றுக்கொள்ள முடியாது எனத் தெரிவித்துள்ளார். கடந்த சட்டமன்றத் தேர்தலுக்குப் பிறகு அதிமுக எம்.எல்.ஏ-க்கள் அனைவரும் ஒன்றுகூடி எடப்பாடியாரைத் தலைவராகத் தேர்ந்தெடுத்த தீர்மானத்தை நினைவுகூர்ந்த அவர், திமுகவின் ஆதரவோடு ஆட்சி அமைக்க முயன்றதாகக் கூறுவது முற்றிலும் திட்டமிடப்பட்ட பொய் என்று அக்ரிகிருஷ்ண மூர்த்தி விளக்கியுள்ளார்.

இறுதியாக, கட்சிக்கு விசுவாசம் இல்லாமல், தங்களின் சுகபோக வாழ்விற்காக மாற்றுக் கட்சியை நோக்கி ஓடுபவர்களுக்குத் தமிழக மக்களும், கழகத் தொண்டர்களும் தகுந்த நேரத்தில் தக்க பாடம் புகட்டுவார்கள் என்று எச்சரித்துள்ளார். மேலும், பொய்யான பரப்புரைகளை மேற்கொண்டு ஆகாயத்தில் கோட்டை கட்ட நினைப்பவர்களின் எண்ணம் வெறும் கானல் நீராகவே முடியும் என்றும் அவர் தனது அறிக்கையின் வாயிலாகத் திட்டவட்டமாகத் தெரிவித்துள்ளார்.