தமிழகத்தில் அதிக முறை ஆட்சி அதிகாரத்தில் இருந்த பெருமைக்குரிய அதிமுக, நிறுவனத் தலைவர் எம்.ஜி.ஆர் உருவாக்கத்தில், முன்னாள் முதலமைச்சர் ஜெயலலிதாவின் உறுதியான தலைமையின் கீழ் “எஃகு கோட்டை” போலக் கட்டிக்காக்கப்பட்டது. ஆனால், ஜெயலலிதாவின் மறைவுக்குப் பிறகு கட்சியில் உருவெடுத்த அதிகாரப்போட்டிகளும், தொடர்ந்து ஏற்பட்ட பல பிளவுகளும் அதிமுகவை இதுவரை இல்லாத அளவு ஒரு இக்கட்டான நிலைக்குத் தள்ளியுள்ளன.
2016-க்குப் பிறகு ஓபிஎஸ் தர்மயுத்தம், சசிகலா – டிடிவி தினகரன் ஆகியோரின் ஓரங்கட்டல், எடப்பாடி பழனிசாமியின் ஒற்றைத் தலைமை முயற்சி என அடுத்தடுத்து நடந்த நிகழ்வுகள் கட்சியின் அடித்தளத்தையே ஆட்டம்காண வைத்தன. வைத்திங்கம், மனோஜ் பாண்டியன் போன்ற முன்னணி நிர்வாகிகள் விலகியதைத் தொடர்ந்து, 2026 சட்டமன்றத் தேர்தலில் கட்சி சந்தித்த பின்னடைவு உட்கட்சிப் பூசலை மீண்டும் தீவிரமாக்கியுள்ளது.
தேர்தல் முடிவுகளுக்குப் பிறகு, எஸ்.பி. வேலுமணி, சி.வி. சண்முகம் உள்ளிட்ட இரண்டாம் கட்டத் தலைவர்கள் மத்தியில் கருத்து வேறுபாடுகள் தலைதூக்கியுள்ளன. சி.விஜயபாஸ்கர் உள்ளிட்ட சிலர் தமிழக வெற்றி கழகத்தில் இணைந்தது மற்றும் தாராபுரம் இடைத்தேர்தல் முடிவுகள் ஆகியவை எடப்பாடி பழனிசாமியின் தலைமைக்குக் கடுமையான நெருக்கடியை உருவாக்கியுள்ளன. சசிகலா, ஓபிஎஸ், டிடிவி தினகரன் ஆகியோரை மீண்டும் இணைக்க வேண்டும் என்ற குரல்களும் வலுத்து வருகின்றன.
மற்றொருபுறம், அரசியல் களம் புதிய நடிகர்களின் வரவால் பரபரப்பாகியுள்ள சூழலில், தவெக தலைவர் விஜயை எதிர்கொள்வதற்காகத் தனுஷ் போன்ற திரையுலகப் பிரபலங்களின் பெயர் அரசியலில் அடிபடும்போது, அவருக்கு ஆதரவாகப் பேசும் நிலைமைக்குச் சிலர் தள்ளப்பட்டிருப்பது கட்சியின் தொண்டர்களிடையே சலசலப்பை ஏற்படுத்தியுள்ளது. முன்னாள் அமைச்சர் ஆர்.பி. உதயகுமார் போன்றோரின் பேச்சுகள் மற்றும் அக்ரி கிருஷ்ணமூர்த்தி போன்றோரின் பாராட்டுக்கள் களத்தில் பெரும் விவாதப் பொருளாக மாறியுள்ளன.
தலைமையின் செயல்பாடுகள் குறித்துப் பலதரப்பட்ட விமர்சனங்கள் எழுந்துவரும் வேளையில், அதிமுகவை மீண்டும் பழைய பெருமைக்குக் கொண்டுவர வேண்டுமெனில், பிரிந்து சென்றுள்ள அனைத்து முக்கிய நிர்வாகிகளையும் ஒன்றுபடுத்திச் செயல்படுவது மட்டுமே ஒரே வழி என்று அக்கட்சியின் அடிமட்டத் தொண்டர்களும் ஆதரவாளர்களும் கருதுகின்றனர்.