வில்லிவாக்கம் தொகுதி தமிழக வெற்றிக் கழக வேட்பாளர் ஆதவ் அர்ஜுனா, தனது வேட்புமனுவில் மனைவியின் சொத்து விவரங்களை மறைத்துள்ளதாகக் கூறி அவருக்கு எதிராகச் சென்னை உயர்நீதிமன்றத்தில் வழக்குத் தொடரப்பட்டுள்ளது. இத்தொகுதியின் சுயேச்சை வேட்பாளர் தேவராஜன் தாக்கல் செய்துள்ள இந்த மனுவில், மக்கள் பிரதிநிதித்துவ சட்டத்தின்படி வேட்பாளர்கள் தங்களின் மற்றும் குடும்பத்தினரின் முழுமையான சொத்து விவரங்களை வெளிப்படுத்த வேண்டும் என்பது கட்டாயம் என்றும், ஆனால் ஆதவ் அர்ஜுனா திட்டமிட்டே உண்மைகளை மறைத்துள்ளதாகவும் குற்றம் சாட்டியுள்ளார்.
இந்த முறைகேடு தொடர்பாகத் தேர்தல் ஆணையம் உரிய விசாரணை நடத்தி அறிக்கை தாக்கல் செய்ய வேண்டும் என மனுதாரர் வலியுறுத்தியுள்ளார். மேலும், ஆதவ் அர்ஜுனாவின் வேட்புமனுவை ஏற்றுக்கொண்ட தேர்தல் அதிகாரியின் உத்தரவுக்கு இடைக்காலத் தடை விதிக்க வேண்டும் என்றும், விதிமீறல் உறுதி செய்யப்படும் பட்சத்தில் அவரது மனுவை நிராகரிக்க வேண்டும் என்றும் கோரிக்கை விடுக்கப்பட்டுள்ளது. இந்த விவகாரம் தேர்தல் களத்தில் பெரும் பரபரப்பை ஏற்படுத்தியுள்ளது.