நிதி நெருக்கடியில் உள்ள ஜெய்பிரகாஷ் அசோசியேட்ஸ் நிறுவனத்தின் முக்கிய சொத்துக்களைக் கைப்பற்றி, அதானி குழுமம் தனது உள்நாட்டு வர்த்தக விரிவாக்கத்தை அதிரடியாக வேகப்படுத்தியுள்ளது. அமெரிக்காவில் நிலுவையில் இருந்த சட்ட விவகாரங்கள் முடிவுக்கு வந்த உடனேயே இந்த நடவடிக்கை மேற்கொள்ளப்பட்டுள்ளது. கடன் நெருக்கடியில் சிக்கித் தவித்து வந்த ஜெய்பிரகாஷ் அசோசியேட்ஸ் (JAL) நிறுவனத்தின் சொத்துக்களை கிட்டத்தட்ட ரூ.5,700 கோடிக்கு வாங்கும் ஒப்பந்தம் தற்போது செயல்பாட்டு கட்டத்திற்கு வந்துள்ளது. இந்த மெகா ஒப்பந்தத்தின் எதிரொலியாக, இன்றைய பங்குச்சந்தை வர்த்தகத் துவக்கத்தில் அதானி பவர் பங்குகள் ரூ.226.40 வரை உயர்ந்த போதிலும், பின்னர் சந்தை ஏற்ற இறக்கங்களால் சற்று சரிவைச் சந்தித்தன.
இந்த பிரம்மாண்ட சொத்து பரிவர்த்தனைகளைச் சீராக மேற்பார்வையிட ஜெய்பிரகாஷ் அசோசியேட்ஸ் நிறுவனம் ஒரு சிறப்புக் கண்காணிப்புக் குழுவை அமைத்துள்ளது. கடன் கொடுத்தவர்களின் நலனைக் காக்கவும், சொத்து பரிமாற்றத்தை தீவிரமாக கண்காணிக்கவும் இக்குழு செயல்படும். இந்த ஒப்பந்தத்தின்படி, ஜெய்பிரகாஷ் பவர் வென்ச்சர்ஸ் லிமிடெட் (JPVL) நிறுவனத்தில் உள்ள 24% பங்குகளை ரூ.2,994 கோடிக்கு அதானி பவர் வாங்குகிறது. இத்துடன், உத்தரப் பிரதேசத்தில் உள்ள 180 மெகாவாட் கொள்ளளவு கொண்ட சுர்க் தெர்மல் பவர் திட்டமும், அதனுடன் தொடர்புடைய சொத்துக்களும் ரூ.1,200 கோடி மதிப்பில் அதானி பவர் நிறுவனத்திற்கு மாற்றப்பட உள்ளன.
மின்சாரத் துறை மட்டுமின்றி, உரத் துறையிலும் அதானி குழுமம் கால்பதிக்கும் வகையில் இந்த ஒப்பந்தம் வடிவமைக்கப்பட்டுள்ளது. இதன் ஒரு பகுதியாக, கான்பூர் உரத் தொழிற்சாலையின் தாய் நிறுவனமான ஜெய்பீ ஃபெர்டிலைசர்ஸ் அண்ட் இண்டஸ்ட்ரீஸ் நிறுவனம் ரூ.1,500 கோடிக்கு அதானி போர்ட்ஸ் அண்ட் ஸ்பெஷல் இகானமிக் ஜோன் நிறுவனத்திற்கு விற்கப்பட உள்ளது. மேலும், பிரயாக்ராஜ் பவர் ஜெனரேஷன் கம்பெனியில் உள்ள 11.49% பங்குகளை ரூ.1,200 கோடிக்கு அதானி பவர் வாங்குவதற்கான ஒப்பந்தமும் இறுதி செய்யப்பட்டுள்ளது. கௌதம் அதானி தலைமையிலான அதானி குழுமம், கடந்த சில ஆண்டுகளாகவே நிதி நெருக்கடியில் இருக்கும் நிறுவனங்களைக் குறைந்த விலைக்கு வாங்கித் தனது சாம்ராஜ்யத்தை விரிவாக்குவதை ஒரு உத்தியாகவே கையாண்டு வருகிறது.
தேசிய நிறுவன சட்டத் தீர்ப்பாயத்தின் (NCLT) அலகாபாத் பெஞ்ச், அதானி குழுமத்தின் ரூ.14,535 கோடி மதிப்பிலான தீர்வுத் திட்டத்திற்கு அதிகாரப்பூர்வமாக ஒப்புதல் அளித்துள்ளது. இந்த ஏலத்தில் வேதாந்தா குழுமம் அதிக விலை கொடுக்க முன்வந்த போதிலும், கடன் கொடுத்த வங்கிகளும் நிறுவனங்களும் அதானியின் திட்டத்தையே ஒருமனதாக ஆதரித்தன. இந்த அதிரடி சொத்து கைப்பற்றல் மூலம் அதானி பவர் நிறுவனத்தின் மின்சார உற்பத்தித் திறன் மற்றும் எனர்ஜி துறை இருப்பு பெருமளவில் வலுவடையும் என்பதில் சந்தேகமில்லை. சொத்து கைமாறும் செயல்முறை முழுமையடையும் வரை, இந்த ஒட்டுமொத்த நிர்வாகத்தையும் கண்காணிப்புக் குழு தொடர்ந்து கண்காணிக்கும்.