திரையுலகில் இருந்து அரசியலுக்கு வந்து மக்கள் மனதில் தடம் பதிப்பது தமிழகத்தில் புதிதல்ல. புரட்சித் தலைவர் எம்.ஜி.ஆர் தொடங்கி, அதைத் தொடர்ந்து செல்வி ஜெயலலிதா, தற்போதைய தமிழக முதல்வர் விஜய் வரை சினிமா பிரபலங்களின் அரசியல் வருகையும் வெற்றிகளும் தொடர்கதையாகவே இருக்கின்றன. நடிகர்கள் அரசியலுக்கு வருவதைக் கண்டு “கூத்தாடிகளுக்கு அரசியல் தெரியாது” என்றும், அவர்களைப் பார்க்க வரும் கூட்டம் ஓட்டாக மாறாது என்றும் திராவிடக் கட்சிகளான திமுகவும் அதிமுகவும் தொடர்ந்து விமர்சித்து வந்தன. ஆனால், அந்த விமர்சனங்களைப் பொய்யாக்கும் வகையில் தமிழக மக்கள் நடிகர்களைத் தலைவர்களாக ஏற்றுக்கொண்டு அரியணையில் அமர வைத்துப் பதிலடி கொடுத்துள்ளனர்.
இந்நிலையில், சமீபத்தில் நடைபெற்ற விழா ஒன்றில் பேசிய நடிகர் விஷால், “அரசியல்வாதிகள் கூத்தாடித்தனம் பண்ணும்போது, கூத்தாடிகள் அரசியலுக்கு வருவார்கள்; யார் வேண்டுமானாலும் அரசியலுக்கு வரலாம்” என்று வெளிப்படையாகப் பேசி பரபரப்பை ஏற்படுத்தியுள்ளார். தமிழக அரசியல் வரலாற்றில் நடிகர்கள் மீது வைக்கப்படும் வழக்கமான விமர்சனங்களுக்கு இந்த பேச்சு சாட்டையடியாக அமைந்திருக்கிறது. அரசியல்வாதிகளின் செயல்பாடுகள் எல்லை மீறும்போது சாமானிய மக்களும், திரையுலகினரும் அரசியலைக் கையில் எடுப்பது தவிர்க்க முடியாத ஒன்று என்பதை விஷாலின் இந்த கருத்து தெள்ளத் தெளிவாக உணர்த்துகிறது.