எதிர்நீச்சல் தொடரின் மூலம் பிரபலமான நடிகர் மற்றும் இயக்குனர் மாரிமுத்து(57) மாரடைப்பால் காலமானார். இவர் பல்வேறு படங்களில் நடித்துள்ளார். சமீபத்தில் வெளியான ஜெயிலர் படத்தில் மாரிமுத்து முக்கிய கதாபாத்திரத்தில் நடித்தது குறிப்பிடத்தக்கதாகும். சீரியல் டப்பிங் பேசிக் கொண்டிருந்த போது மாரிமுத்து மயங்கி விழுந்தார்.
அவரை வடபழனியில் இருக்கும் தனியார் மருத்துவமனையில் சிகிச்சைக்காக அனுமதித்தனர். ஆனால் அங்கு சிகிச்சை பலனின்றி மாரிமுத்து உயிரிழந்தார். நடிகர் மாரிமுத்து இறப்பதற்கு முன்பாக பேசிய வார்த்தைகள் அனைவரையும் அதிர்ச்சியில் ஆழ்த்தியுள்ளது. டப்பிங் பேசும்போது அந்த அறையில் ஏசி இல்லாததால் நடிகர் மாரிமுத்துவுக்கு அசௌகரியமாக இருந்துள்ளது.
இதுபற்றி ஆடியோ இன்ஜினியரிடம் கூறிவிட்டு மாரிமுத்து வெளியே வந்துள்ளார். பின்னர் நடிகர் கமலேஷ் கேட்டபோது ஒரு மாதிரி அசௌகரியமாக இருப்பதாக தெரிவித்துள்ளார். உடனே மாரிமுத்து தனது மகளை செல்போன் மூலம் தொடர்பு கொண்டு மருத்துவமனைக்கு செல்ல வேண்டும் என தெரிவித்துள்ளார். பிறகு அவரே அருகில் இருக்கும் மருத்துவமனைக்கு காரை ஓட்டி சென்றார்.
அந்த மருத்துவமனை வாசலிலேயே நடிகர் மாரிமுத்து நிலைதடுமாறினார். உடனடியாக அவருக்கு மருத்துவமனை நிர்வாகத்தினர் சிகிச்சை அளித்தனர். ஆனாலும் மாரிமுத்துவை காப்பாற்ற இயலவில்லை. அவரது இறப்பு திரை துறையினரையும், ரசிகர்களையும் பெரும் சோகத்தில் ஆழ்த்தியுள்ளது.