ஒரு மாநிலத்தின் உண்மையான முன்னேற்றம் என்பது வெறும் சாலைகள் மற்றும் தொழிற்சாலைகளின் வளர்ச்சியில் மட்டும் அடங்கிவிடவில்லை என்று சட்டப்பேரவையில் தமிழக முதலமைச்சர் தெரிவித்துள்ளார். காவல்துறை மானியக் கோரிக்கை விவாதம் மீதான பதிலுரையின் போது பேசிய அவர், “அம்மாநிலத்தில் வாழும் ஒவ்வொரு குடிமகனும் பயமில்லாமல் வாழ்வதில்தான் உண்மையான வளர்ச்சி இருக்கிறது. சட்டம் ஒழுங்கு சீராக அமைந்தால் மட்டுமே புதிய தொழில்களும் வேலைவாய்ப்புகளும் தடையின்றி உருவாகும். குற்றவாளிகளைக் கைது செய்வது மட்டுமன்றி, பொருளாதார வளர்ச்சிக்கும் சமூக அமைதிக்கும் அடித்தளமாக விளங்குவது காவல்துறையே ஆகும்” என்று சுட்டிக்காட்டினார்.
தொடர்ந்து காவல்துறையின் முக்கியத்துவத்தைப் பற்றிப் பேசிய முதலமைச்சர், சட்டத்தை மதித்து நடக்கும் சாமானிய மக்களுக்குக் காவல்துறை என்றும் உற்ற நண்பனாகத் திகழ வேண்டும் என்றார். அதேவேளையில், சட்டத்தையும் மற்றவர்களின் உரிமைகளையும் மீறுபவர்களுக்கு அச்சத்தை ஏற்படுத்தும் எதிரியாகச் செயல்பட வேண்டும் என்று வலியுறுத்தினார். இத்தகைய பண்புகளைக் கொண்டு, காவலர்கள் அனைவரும் எவ்வித பயமும் இன்றி நேர்மையாகவும் சுதந்திரமாகவும் பணியாற்றுவதற்கான தகுந்த சூழலை உருவாக்குவதில் இந்த அரசு தீவிர முன்னுரிமை அளித்து வருவதாகத் தெரிவித்தார்.
மேலும், காவல்துறையின் சட்டப்பூர்வ நடவடிக்கைகளில் அரசியல் தலைவர்களோ அல்லது அதிகாரிகளோ தேவையின்றித் தலையிடக் கூடாது என்பதைத் தாம் தொடர்ந்து வலியுறுத்தி வருவதாகத் தெரிவித்தார். முதலமைச்சராக இருந்தாலும் சரி, அமைச்சர்களாகவோ அல்லது உயர் அதிகாரிகளாகவோ இருந்தாலும் இதில் விதிவிலக்கல்ல என்று குறிப்பிட்ட அவர், குற்றச் செயல்களில் ஈடுபடுபவர் யாராக இருந்தாலும் தயவுதாட்சணியமின்றி நடவடிக்கை எடுக்க வேண்டும் என்றும், சட்டத்தின் முன் அனைவரும் சமம் என்பதே இந்த அரசின் மிக முக்கியமான கண்ணோட்டம் என்றும் உறுதியளித்தார்.
