தமிழக அரசியல் களத்தில் தேர்தல் களம் சூடுபிடித்துள்ள நிலையில், தமிழக வெற்றிக் கழகத்தின் (தவெக) முக்கிய நிர்வாகியான ஆதவ் அர்ஜுனா, சென்னை ஆர்.கே. நகரில் நடைபெற்ற பொதுக்கூட்டத்தில் திமுக மற்றும் அதிமுக ஆகிய இரு திராவிடக் கட்சிகளையும் கடுமையாகச் சாடிப் பேசியுள்ளார். வடசென்னை பகுதிகள் திட்டமிட்டே ஏழ்மையில் வைக்கப்பட்டுள்ளதாகக் குற்றம்சாட்டிய அவர், அண்ணா நகருக்கும் ஆர்.கே. நகருக்கும் இடையிலான வளர்ச்சி வேறுபாட்டைச் சுட்டிக்காட்டினார். மேலும், தான் திமுகவில் பணியாற்றிய காலத்தையும், அங்கு தனக்குரிய அங்கீகாரம் கிடைக்காததையும் அவர் தனது உரையில் வெளிப்படையாகப் பகிர்ந்து கொண்டார்.
தவெக மற்றும் பாஜக இடையே கூட்டணி நிலவுவதாக வரும் செய்திகளை வதந்தி என்று மறுத்த ஆதவ் அர்ஜுனா, இது திமுக மற்றும் அதிமுகவால் பரப்பப்படும் பொய் பிரச்சாரம் என்று விளக்கினார். மதச்சார்பின்மை கொள்கையில் விஜய் உறுதியாக இருப்பதாலேயே ‘ஜனநாயகன்’ திரைப்படம் வெளியாவதில் சிக்கல்கள் நீடிப்பதாக அவர் தெரிவித்தார். ஒருவேளை கொள்கையை விட்டுக் கொடுத்திருந்தால், டெல்லி விஜய்யை முதல்வர் ஆக்கியிருக்கும் என்றும், ஆனால் மக்கள் நலனே முக்கியம் என்பதால் விஜய் கொள்கை பிடிப்போடு இருப்பதாகவும் அவர் குறிப்பிட்டார்.
கரூரில் விஜய் சென்றபோது மக்கள் கூடியதை ‘ஷூட்டிங்’ என்று விமர்சிப்பது முழுக்க முழுக்க பொய் எனச் சாடிய ஆதவ் அர்ஜுனா, விஜய்க்கு மக்கள் மத்தியில் இருக்கும் செல்வாக்கை ஆளும் தரப்பு பார்த்து அஞ்சுவதாகத் தெரிவித்தார். திருவாரூர் பொதுக்கூட்டம் முதல் கரூரில் மக்கள் அலை எனத் தவெகவின் எழுச்சி திமுகவை நடுங்க வைத்துள்ளதாகவும், அதன் காரணமாகவே பல்வேறு முட்டுக்கட்டைகள் தவெகவின் பிரச்சாரத்திற்கு விதிக்கப்படுவதாகவும் அவர் தனது உரையில் ஆதங்கத்துடன் பதிவு செய்தார்.
இறுதியாக, தவெக தரப்பில் எடுக்கப்பட்ட சமீபத்திய சர்வே முடிவுகளைப் பகிர்ந்து கொண்ட ஆதவ் அர்ஜுனா, திமுகவை விட தவெக 2% கூடுதல் வாக்குகளைப் பெற்று முதலிடத்தில் இருப்பதாகக் கூறினார். இந்த சர்வேயின்படி அதிமுக மூன்றாவது இடத்திற்குத் தள்ளப்பட்டுள்ளதாகவும், இந்த அதிரடி வளர்ச்சியால் ஏற்பட்ட பயத்தின் காரணமாகவே எதிர்க்கட்சிகள் தவெக மீது கடுமையான விமர்சனங்களை முன்வைப்பதாகவும் அவர் தெரிவித்தார். ஏற்கனவே தவெகவின் வாக்கு சதவீதம் உயர்ந்து வருவதாகக் கூறி வந்த ஆதவ் அர்ஜுனா, தற்போது திமுகவை முந்திவிட்டதாகக் கூறியுள்ளது அரசியல் வட்டாரத்தில் பெரும் விவாதத்தைக் கிளப்பியுள்ளது.