தமிழக அமைச்சர் ஆதவ் அர்ஜுனா, மதுராந்தகத்தில் நடைபெற்ற மாற்றுக் கட்சியினர் தமிழக வெற்றிக் கழகத்தில் இணையும் விழாவில் கலந்துகொண்டு ஆவேசமாக உரையாற்றினார். அப்போது, தற்போதைய தவெக ஆட்சியில் 8 பட்டியலின அமைச்சர்கள் இடம்பெற்றுள்ளதைச் சுட்டிக்காட்டிய அவர், தமிழக வரலாற்றில் இதற்கு முன்பு இதுபோன்று எப்போதாவது நடந்திருக்கிறதா என்று கேள்வி எழுப்பினார்.
மேலும், சமூக நீதி குறித்துப் பேசும் திமுக, தங்களது ஆட்சிக் காலத்தில் எந்த இடத்தில் பட்டியலின மக்களுக்கு ஆட்சி அதிகாரத்தைப் பகிர்ந்தளித்தது என்றும் அவர் மிகக் கடுமையான விமர்சனத்தை முன்வைத்தார். கடந்த காலத் தேர்தல்களுக்கு முன்பாக மறைந்த முன்னாள் முதல்வர் எம்.ஜி.ஆருக்கு திமுக என்னென்ன கொடுமைகளைச் செய்ததோ, அதையே தான் தற்போதைய முதலமைச்சர் விஜய்க்கும் செய்தது என்றும் அவர் குற்றம் சாட்டினார்.
திமுக தலைவர் மு.க.ஸ்டாலின் தவெகவின் வெற்றியை வெறும் ‘கவர்ச்சி’ என்று விமர்சித்ததற்குப் பதிலடி கொடுத்த ஆதவ் அர்ஜுனா, “50 வருட அரசியல்வாதியான உங்களுக்கு ஏன் அந்த கவர்ச்சி இல்லை?” என்று காரசாரமாகக் கேள்வி எழுப்பினார். தவெக அமைச்சரின் இந்த அதிரடியான பேச்சு தற்போது தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது.