சாதாரண சளி, காய்ச்சல்… ஊசி போட்டதும் 20 நிமிடங்களில் துடிதுடித்த இளைஞர்… போலி மருத்துவரால் நேர்ந்த விபரீதம்…!

திருப்பத்தூர் அருகே முறையான மருத்துவம் படிக்காமல் காய்ச்சலுக்கு ஊசி போட்டு 20 நிமிடங்களில் வாலிபர் உயிரிழந்த சம்பவம் அதிர்ச்சியை ஏற்படுத்தியுள்ளது. திருப்பத்தூர் மாவட்டம் அடுத்த புதுக்கோட்டை ராஜி கவுண்டர் வட்டம் பகுதியை சேர்ந்த சங்கர் என்பவருடைய மகன் சக்திவேல் (34). இவர் அதே பகுதியில் வெல்டிங் கடையில் வேலை செய்து வரும் நிலையில் கடந்த இரண்டு நாட்களாக சளி மற்றும் காய்ச்சல் இருந்துள்ளது. சக்திவேல் வீட்டிற்கு மருத்துவம் பார்ப்பதற்காக பார்த்திபன் (35) என்ற மருத்துவர் சென்று ஊசி போட்டுள்ளார்.

ஊசி போட்ட 20 நிமிடங்கள் கழித்து சக்திவேல் மூச்சுப் பேச்சு இல்லாமல் இருந்ததால் அதிர்ச்சி அடைந்த குடும்பத்தினர் ஆம்புலன்ஸ் மூலமாக மருத்துவமனைக்கு அழைத்துச் சென்றனர். ஆனால் சக்திவேலை பரிசோதித்த மருத்துவர்கள் அவர் ஏற்கனவே இறந்து விட்டதாக தெரிவித்தனர். உடனே தகவல் அறிந்து சம்பவ இடத்திற்கு விரைந்த போலீசார் சக்திவேல் உடலை கைப்பற்றி பிரேத பரிசோதனைக்கு அனுப்பி வைத்தனர். போலீசார் மேற்கொண்ட முதல் கட்ட விசாரணையில் திருப்பத்தூர் சிவராஜ் பேட்டை பகுதியை சேர்ந்த காமராஜ் என்பவருடைய மகன் பார்த்திபன் என்பவர் டயாலிசிஸ் டெக்னீசியன் படிப்பு முடித்துவிட்டு அரசு மருத்துவமனையிலும் வேலை பார்த்து வந்துள்ளார்.

அரசு மருத்துவமனையிலும் பல குளறுபடிகளில் ஈடுபட்டதால் ஒரு வருடத்திற்கு முன்பு அரசு மருத்துவமனை நிர்வாகம் அவரை பணியிலிருந்து நீக்கி உள்ளது. இதனைத் தொடர்ந்து புதுக்கோட்டை மற்றும் அதன் சுற்றுவட்டார கிராமங்களுக்கு இரு சக்கர வாகனத்தில் சென்று சக்திவேல் நோயாளிகளின் வீட்டில் மருத்துவம் பார்த்து வந்துள்ளார். முறையான மருத்துவ படிப்பு படிக்காமல் காய்ச்சலுக்கு ஊசி போட்டு 20 நிமிடங்கள் கழித்து வாலிபர் உயிரிழந்ததால் அப்பகுதியில் பரபரப்பு அதிர்ச்சியும் ஏற்பட்டுள்ளது. தற்போது போலீசார் இந்த வழக்கை தீவிரமாக விசாரித்து வருகிறார்கள்.