ஸ்ரீவைகுண்டம் தொகுதி தவெக சட்டமன்ற உறுப்பினர் சரவணனின் பெயரைப் பயன்படுத்தி, அவரது லாட்டரி நிறுவனத்தில் வேலை வாங்கித் தருவதாகக் கூறி தவெக நிர்வாகிகள் சிலர் தன்னை பாலியல் வன்கொடுமை செய்ததாகப் பாதிக்கப்பட்ட பெண் ஒருவர் சுமத்தியுள்ள குற்றச்சாட்டு அரசியல் வட்டாரத்தில் பெரும் பரபரப்பை ஏற்படுத்தியுள்ளது. பாதிக்கப்பட்ட பெண் அளித்துள்ள புகாரில், தவெகவைச் சேர்ந்த நிர்வாகிகளான பாலசுப்பிரமணியன் மற்றும் ஜெயபால் ஆகிய இருவர் இந்த கொடூரச் செயலில் ஈடுபட்டதாகக் குறிப்பிட்டுள்ளார். எம்எல்ஏ-வின் பெயரைச் சொல்லி கட்சியின் முக்கிய பிரமுகர்களே இப்படி ஒரு குற்றச்சாட்டில் சிக்கியிருப்பது, தற்போது தமிழக அரசியல் களத்தில் விவாதப் பொருளாக மாறியுள்ளது.
இந்தக் கடுமையான பாலியல் வன்கொடுமை புகாரை ஸ்ரீவைகுண்டம் தவெக எம்எல்ஏ சரவணன் திட்டவட்டமாக மறுத்துள்ளார். தன் மீதும், தனது கட்சியின் மீதும் திட்டமிட்டு அவப்பெயரை உண்டாக்க வேண்டும் என்ற நோக்கத்தில், சிலரது தூண்டுதலின் பேரிலேயே இந்தப் பொய்ப் புகார் அளிக்கப்பட்டுள்ளது என்று அவர் விளக்கம் அளித்துள்ளார். மேலும், இந்த விவகாரத்தில் யார் தவறு செய்திருந்தாலும், தவெக ஆட்சியில் அவர்கள் மீது கடுமையான சட்ட நடவடிக்கை பாயும் என்றும், தவறிழைத்தவர்களுக்கு நிச்சயம் தண்டனை கிடைக்கும் என்றும் அவர் உறுதியளித்துள்ளார்.