உத்தரப் பிரதேச மாநிலம் சோன்பத்ரா மாவட்டத்தில், ஐஸ்கிரீம் வாங்குவதற்காக முதலாவது மாடி பால்கனியில் இருந்து கீழே எட்டிப்பார்த்த நபர் ஒருவர் தவறி விழுந்த அதிர்ச்சி சம்பவம் நடந்துள்ளது. மெட்டுகளை இறங்கி கீழே செல்ல சோம்பேறித்தனம் பட்டுக்கொண்டு, அந்த நபர் செய்த இந்த விபரீத முயற்சி விபத்தில் முடிந்தது. இதுதொடர்பான சிசிடிவி காட்சிகள் தற்போது சமூக வலைதளங்களில் வெளியாகி பெரும் வைரலாகி வருகிறது.
அப்பகுதியில் ஐஸ்கிரீம் விற்கும் நபர் தெருவில் வந்தபோது, முதலாவது மாடியில் நின்றிருந்த அந்த நபர் ஐஸ்கிரீம் வாங்குவதற்காக அவரை அழைத்துள்ளார். கீழே இறங்கி வருவதற்குப் பதிலாக, மாடியின் பால்கனி சுவரில் இருந்து கீழே குனிந்து ஐஸ்கிரீமை வாங்க முயன்றார். அதே நேரத்தில் கீழே இருந்த வியாபாரியும் கையை உயர்த்தி ஐஸ்கிரீமை கொடுக்க முயன்றபோது, பால்கனியில் இருந்த நபர் எதிர்பாராதவிதமாகத் தனது சமநிலையை இழந்து நேராகக் கீழே விழுந்தார்.
அவர் திடீரென கீழே விழுந்ததைக் கண்டு ஐஸ்கிரீம் வியாபாரியும், அருகில் இருந்த பொதுமக்களும் கடும் அதிர்ச்சியடைந்தனர். உடனடியாக ஓடிவந்த குடும்பத்தினரும் அக்கம் பக்கத்தினரும், காயமடைந்த அந்த நபரை மீட்டு சிகிச்சைக்காக மருத்துவமனையில் அனுமதித்தனர். இதுகுறித்து தகவலறிந்த சோன்பத்ரா போலீஸார், விபத்தில் காயமடைந்த நபருக்கு மருத்துவமனையில் தீவிர சிகிச்சை அளிக்கப்பட்டு வருவதாகவும், தற்போது அவரது உடல்நிலை சீராக உள்ளதாகவும் தெரிவித்துள்ளனர்.