தெலங்கானா மாநிலம் முலுகு மாவட்டத்தில் குரங்குகளைக் கொல்வதற்காக விஷம் கலந்து வைக்கப்பட்ட லட்டை தெரியாமல் சாப்பிட்ட நான்கு வயது சிறுவன் உயிரிழந்த சம்பவம் பெரும் சோகத்தை ஏற்படுத்தியுள்ளது. கோவிந்தராவ்பேட்டை மண்டலத்தைச் சேர்ந்த அஸ்வினி நந்தன் என்ற அந்த சிறுவன், வீட்டின் அருகே விளையாடிக் கொண்டிருந்தபோது தரையில் கிடந்த லட்டை எடுத்துச் சாப்பிட்டுள்ளான்.
மேலும் சிறிது நேரத்திலேயே உடல்நலம் பாதிக்கப்பட்ட அச்சிறுவனை சிகிச்சைக்காக மருத்துவமனைக்கு அழைத்துச் சென்றும், டாக்டர்களின் முயற்சி பலனின்றி அவன் பரிதாபமாக உயிரிழந்தான். இந்தச் சம்பவம் அப்பகுதி மக்களிடையே பெரும் அதிர்ச்சியையும் ஆத்திரத்தையும் ஏற்படுத்தியுள்ளது. குரங்குகளின் அட்டகாசத்தைக் கட்டுப்படுத்த உள்ளூர் பஞ்சாயத்து ஊழியர்களே இவ்வாறு விஷம் கலந்த லட்டுகளை வீதிகளில் வீசியதாகக் கூறப்படுகிறது.
இதனால் அதிகாரிகளின் இத்தகைய அலட்சியமான போக்கால் ஒரு அப்பாவி உயிரைப் பறிகொடுத்த பெற்றோர் கதறி அழுவது காண்போரை கண்கலங்கச் செய்கிறது. இச்சம்பவம் குறித்து வழக்குப் பதிவு செய்துள்ள காவல்துறையினர், பொது இடங்களில் விஷம் கலந்த உணவை வைத்தது யார் என்பது குறித்து தீவிர விசாரணை நடத்தி வருகின்றனர்.