தமிழக அரசியல் வரலாற்றில் இதுவரை கண்டிராத ஒரு அதிகாரப் போட்டி, 2026 தேர்தல் முடிவுகளுக்குப் பிறகு அரங்கேறி வருகிறது. தனிப்பெரும் கட்சியாக உருவெடுத்தாலும், ஆட்சி அமைக்கத் தேவையான மெஜாரிட்டியை நிரூபிக்கத் தவெக தலைவர் விஜய் போராடி வருகிறார். ஆளுநர் வழங்கியுள்ள 14 நாட்கள் அவகாசத்திற்குள் பெரும்பான்மையைத் திரட்ட வேண்டிய கட்டாயத்தில் அவர் உள்ள நிலையில், பாமக-வின் திடீர் ரூட் மாற்றம் அவருக்குப் பெரும் தலைவலியை ஏற்படுத்தியுள்ளது. 5 தொகுதிகளைக் வைத்துள்ள பாமக-வை இழுக்க விஜய் திட்டமிட்டிருந்த நிலையில், சவுமியா அன்புமணிக்குத் துணை முதல்வர் பதவி கேட்கப்படுவதாக வெளியாகும் தகவல்கள் தவெக முகாமை நிலைதடுமாற வைத்துள்ளன.
இந்தச் சூழலில், டெல்லியில் இருந்து அன்புமணி ராமதாஸுக்காகக் கிளப்பப்பட்டுள்ள ஒரு ரகசிய ‘ஆஃபர்’ தான் இப்போது தமிழக அரசியலின் ஹாட் டாபிக். அன்புமணிக்கு மத்திய அமைச்சரவையில் அதிகாரமிக்க ஒரு பதவி வழங்க பாஜக மேலிடம் தயாராகி வருவதாகத் தெரிகிறது. மாநில அளவில் ஒரு துணை முதல்வர் பதவியை விட, மத்தியில் ஒரு வலுவான அமைச்சர் பதவி என்பது பாமக-வின் வளர்ச்சிக்கு உதவும் என அன்புமணி கருத வாய்ப்புள்ளது. ஒருவேளை டெல்லி ஆஃபரை ஏற்று அன்புமணி தவெக-விற்குத் தார்மீக ஆதரவு அளிக்க மறுத்துவிட்டால், விஜய்யின் முதல்வர் கனவு மிகப்பெரிய கேள்விக்குறியாக மாறும்.
பாமக கைகொடுக்காத பட்சத்தில், விஜய்க்கு முன்னால் இருக்கும் ஒரே வழி 47 இடங்களை வைத்துள்ள அதிமுக-வின் தயவை நாடுவதுதான். ஆனால், தேர்தல் களத்தில் அதிமுக-வை மிகக் கடுமையாக எதிர்த்துப் பிரச்சாரம் செய்த விஜய், இப்போது அதிகாரத்திற்காக எடப்பாடி பழனிசாமியிடம் கையேந்துவாரா என்பது தார்மீக ரீதியாகப் பெரிய சிக்கலை உண்டாக்கும். “மாற்று அரசியல்” என்று முழங்கிய விஜய், பழைய திராவிடக் கட்சியான அதிமுக-வுடன் கைகோர்த்தால் அவரது பிம்பம் சிதையும் அபாயம் உள்ளது. அதேசமயம், ஆதரவு பெறத் தவறினால் ஆட்சி கவிழ்ந்து மறுதேர்தல் வரக்கூடும், இது தவெக-விற்குப் பெரும் நிதி மற்றும் அரசியல் நெருக்கடியைத் தரும்.
தற்போது ஆளுநர் கொடுத்த டைம் ஓடிக்கொண்டிருக்கும் நிலையில், தவெக முகாமில் ஒருவித அமைதி நிலவுகிறது. அன்புமணி ராமதாஸ் எடுக்கப்போகும் அந்த ஒரு முடிவுதான் தமிழகத்தின் அடுத்த ஐந்து ஆண்டுகளைத் தீர்மானிக்கப்போகிறது. டெல்லி போடும் கணக்குகளுக்கு மத்தியில், விஜய் தனது அரசியல் சாதுரியத்தால் மெஜாரிட்டியை நிரூபித்து அரியணையில் ஏறுவாரா அல்லது கூட்டணிக் கணக்குகளால் அவரது முதல்வர் கனவு முடங்குமா என்பது இன்னும் சில தினங்களில் தெரிந்துவிடும். தமிழகமே உற்றுநோக்கும் இந்த அரசியல் சதுரங்க வேட்டையில் இறுதி வெற்றி யாருடையது என்பதே இப்போதைய எதிர்பார்ப்பு.