தமிழகத் தேர்தலில் நடிகர் விஜய்யின் தமிழக வெற்றிக் கழகம் 108 இடங்களைக் கைப்பற்றி தனிப்பெரும் கட்சியாக உருவெடுத்துள்ள நிலையில், இணையதளங்களில் ஒரு பழைய புகைப்படம் காட்டுத்தீயாகப் பரவி வருகிறது. மறைந்த முன்னாள் முதல்வர் கருணாநிதியுடன் சிறுவனாக விஜய் இருக்கும் அந்தப் புகைப் படத்தை இயக்குநர் ராம்கோபால் வர்மா தனது சமூக வலைதளப் பக்கத்தில் பகிர்ந்துள்ளார். “பின்னாலிருக்கும் இந்தச் சிறுவன், ஒருநாள் தனது கட்சியையே தோற்கடிப்பார் என்று கலைஞர் கனவிலும் நினைத்திருக்க மாட்டார்” என அவர் பதிவிட்டுள்ள கருத்து பெரும் வைரலாகியுள்ளது.
இந்தத் தேர்தல் முடிவுகள் தமிழக அரசியலில் ஒரு மிகப்பெரிய வரலாற்று மாற்றத்தை ஏற்படுத்தியுள்ளன. தவெக 108 இடங்களில் வென்றிருந்தாலும், ஆட்சி அமைக்கத் தேவையான 118 இடங்களை அடைய இன்னும் 10 இடங்கள் தேவைப்படுகின்றன. இதனால் காங்கிரஸ் மற்றும் பாமக ஆகிய கட்சிகளுடன் விஜய் தரப்பு பேச்சுவார்த்தை நடத்தி வருவதாகத் தெரிகிறது. ஒருவேளை இந்த ஆதரவு கிடைக்காத பட்சத்தில், மாநிலத்தில் ஆளுநர் ஆட்சி அமல்படுத்தப்படவும் வாய்ப்புள்ளதாக அரசியல் நோக்கர்கள் கருதுகின்றனர்.
கருணாநிதியுடன் இருக்கும் விஜய்யின் அந்தப் பழைய புகைப்படத்தைப் பார்க்கும் நெட்டிசன்கள், “கலைஞர் மட்டுமல்ல, அந்தச் சிறுவனாக இருந்த விஜய்யே கூட தான் பின்னாளில் இப்படி ஒரு அரசியல் புரட்சியைச் செய்வோம் என்று நினைத்திருக்க மாட்டார்” என வியப்புடன் பதிவிட்டு வருகின்றனர். தமிழகத்தில் ஒரு புதிய கூட்டணி ஆட்சி அமையுமா அல்லது அரசியல் இழுபறி நீடிக்குமா என்பது அடுத்த சில நாட்களில் தெரிந்துவிடும். நீண்ட காலத்திற்குப் பிறகு தமிழகம் ஒரு கூட்டணி ஆட்சியைச் சந்திக்கும் கட்டத்தில் உள்ளது.