மர்ம மரணத்தில் ‘ட்விஸ்ட்’ … வெளிவந்த போஸ்ட்மார்ட்டம் ரிப்போர்ட்… கழுத்து நெரித்துக் கொல்லப்பட்டது அம்பலம்… ஈரோட்டில் 1 மணி நேரம் நீடித்த பரபரப்பு…!!

ஈரோடு மாவட்டம் பிராமண பெரிய அக்ரஹாரம் அருகே, இரண்டு மகன்களின் தாயான சுகுணா என்ற பெண் மர்மமான முறையில் சடலமாகக் கண்டெடுக்கப்பட்டார். எம்.ஜி.ஆர் நகரைச் சேர்ந்த தினேஷ் என்பவரின் மனைவியான இவருக்கும், அதே பகுதியைச் சேர்ந்த தௌபீக் என்ற இளைஞருக்கும் இடையே திருமணத்தை மீறிய உறவு இருந்ததாகக் கூறப்படுகிறது. இந்நிலையில், தௌபீக் வசிக்கும் காட்டூர் பகுதியில் ஆகஸ்ட் 26-ஆம் தேதி காலை சுகுணா மர்மமான முறையில் இறந்து கிடந்துள்ளார்.

தகவலறிந்து வந்த கருங்கல்பாளையம் காவல் துறையினர் உடலை மீட்டு, பெருந்துறை அரசு மருத்துவக் கல்லூரி மருத்துவமனைக்கு உடற்கூறாய்வுக்காக அனுப்பி வைத்தனர். அந்தப் பரிசோதனையின் முடிவில், பெண் கழுத்து நெரிக்கப்பட்டு கொலை செய்யப்பட்டுள்ளார் என்ற அதிர்ச்சியூட்டும் தகவல் வெளியானது. இதனைத் தொடர்ந்து, சுகுணாவின் மரணத்தில் சந்தேகம் இருப்பதாகக் கூறி அவரது உறவினர்கள் இதுவொரு கொலை என பகிரங்கமாகக் குற்றம் சாட்டியுள்ளனர்.

இந்தச் சம்பவத்தில் தொடர்புடையதாகக் கருதப்படும் தௌபீக்கை உடனடியாக கைது செய்து, சட்டப்படி கடுமையான தண்டனை பெற்றுத் தர வேண்டும் என வலியுறுத்தி பெண்ணின் உறவினர்கள் பவானி சாலையில் திடீர் மறியலில் ஈடுபட்டனர். சுமார் ஒரு மணி நேரத்திற்கும் மேலாக நீடித்த இந்தப் போராட்டத்தால் அங்கு பெரும் பரபரப்பு நிலவியது. இதையடுத்து, போராட்டத்தில் ஈடுபட்டவர்களுடன் காவல் துறையினர் பேச்சுவார்த்தை நடத்தி சமாதானப்படுத்தியதோடு, இச்சம்பவம் குறித்த விசாரணையைத் தீவிரப்படுத்தியுள்ளனர்.