விசாகப்பட்டினத்தில் உள்ள அவந்தி பொறியியல் கல்லூரியில் பி.டெக் மாணவி ஒருவர் பாலியல் வன்கொடுமைக்கு ஆளாக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. இச்சம்பவம் தொடர்பாக பாதிக்கப்பட்ட மாணவி அளித்த புகாரின் அடிப்படையில், அதே கல்லூரியில் பயிலும் திலீப் என்ற மாணவர் மீது பீமிலி காவல்துறையினர் வழக்குப் பதிவு செய்துள்ளனர். பாதிக்கப்பட்ட மாணவிக்கும் திலீப்புக்கும் இடையே கடந்த 10 நாட்களுக்கு முன்பு இன்ஸ்டாகிராம் (Instagram) வாயிலாக அறிமுகம் ஏற்பட்டுள்ளது. இந்தத் குறுகிய கால அறிமுகத்தைப் பயன்படுத்தி, மாணவியைத் தனது வலையில் வீழ்த்திய திலீப், அவரைப் பாலியல் வன்கொடுமை செய்துள்ளார்.
அதோடு நிறுத்தாமல், மாணவியின் நிர்வாணப் புகைப் படங்கள் மற்றும் வீடியோக்களை எடுத்து அவற்றை ஒரு சமூக வலைதளக் குழுவில் பகிர்ந்துள்ளார். இதனால் மனமுடைந்த மாணவி, துணிச்சலுடன் காவல்துறையை அணுகிப் புகார் அளித்தார். இந்தச் சம்பவம் குறித்து விசாகப்பட்டினம் மாநகரக் காவல் ஆணையர் விளக்கம் அளித்துள்ளார். திலீப் மீது பாலியல் வன்கொடுமை மற்றும் தகவல் தொழில்நுட்ப சட்டத்தின் (IT Act) கீழ் வழக்குப் பதிவு செய்யப்பட்டு, அவர் கைது செய்யப்பட்டுள்ளார். மேலும், இந்த வீடியோக்கள் வேறு யாருக்கெல்லாம் பகிரப்பட்டது என்பது குறித்தும், இதில் வேறு மாணவர்களுக்குத் தொடர்பு உள்ளதா என்பது குறித்தும் தீவிர விசாரணை நடைபெற்று வருகிறது.