தூத்துக்குடி மாவட்டம் திருச்செந்தூர் அருகேயுள்ள குமாரபுரத்தைச் சேர்ந்த ஓய்வுபெற்ற பேராசிரியர் ரேணுகா, தனது கணவர் அன்புமணி மற்றும் மனநலம் பாதிக்கப்பட்ட இளைய மகன் தங்கபாலனுடன் வசித்து வந்தார். இவர்களது மூத்த மகன் சென்னையில் காவல்துறை அதிகாரியாகப் பணியாற்றி வருகிறார். இந்நிலையில், கணவர் அன்புமணி குலதெய்வக் கோவிலுக்குச் சென்றிருந்த நேரத்தில், வீட்டில் தாயும் இளைய மகனும் மட்டுமே இருந்துள்ளனர். அந்தச் சமயத்தில் எதிர்பாராதவிதமாக, தங்கபாலன் வீட்டில் இருந்த அம்மிக்கல்லை எடுத்து தனது தாய் ரேணுகாவின் தலையில் போட்டு கொடூரமாகத் தாக்கியுள்ளார்.
இந்தக் கொடூரத் தாக்குதலில் பலத்த காயமடைந்து ரத்த வெள்ளத்தில் உயிருக்குப் போராடிக்கொண்டிருந்த தாயை, தங்கபாலன் தனது செல்போனில் புகைப்படம் எடுத்து சென்னையில் உள்ள தனது அண்ணனுக்கு வாட்ஸ்அப் மூலம் அனுப்பியுள்ளார். அந்தப் புகைப்படத்தைக் கண்டு பெரும் அதிர்ச்சியடைந்த மூத்த மகன், உடனடியாக தனது தந்தை அன்புமணிக்குத் தகவல் தெரிவித்தார். பதறிப்போய் அவசரமாக வீட்டுக்குத் திரும்பி வந்து பார்த்தபோது, மனைவி ரேணுகா பரிதாபமாக உயிரிழந்து கிடப்பதைக் கண்டு தந்தை பேரதிர்ச்சி அடைந்தார்.