“துரதிஷ்டம் என தூக்கி எறிந்த தம்பதி!”…. நடுரோட்டில் தவித்த பச்சிளம் குழந்தை… சினிமா பாணியில் அரங்கேறிய பகீர் கடத்தல்…!!!

மத்தியப் பிரதேச மாநிலம் குனாவைச் சேர்ந்த தொழிலதிபர் தம்பதியினர், ஒரு குழந்தையைச் சாலையில் கைவிட்டதாகத் தொடங்கிய வழக்கு, தற்போது ஒரு மிகப்பெரிய குழந்தைக் கடத்தல் மற்றும் விற்பனை மோசடியைத் வெளிச்சத்திற்குக் கொண்டு வந்துள்ளது. கடந்த ஏப்ரல் 18 அன்று, ஷியோபூர் தேசிய நெடுஞ்சாலையில் அனாதையாகக் கைவிடப்பட்ட குழந்தையை மீட்ட அதிகாரிகள், விசாரணையைத் தொடங்கியபோது அடுக்கடுக்கான அதிர்ச்சித் தகவல்கள் வெளியாகின. சிசிடிவி மற்றும் தொழில்நுட்ப ஆதாரங்கள் மூலம் போபாலில் சிக்கிய அந்தத் தம்பதியினர், ஆரம்பத்தில் அக்குழந்தையைச் சட்டப்பூர்வமாகத் தத்தெடுத்ததாகக் கூறி நாடகமாடினர்.

இருப்பினும், காவல்துறையினரின் தீவிர விசாரணையில், இந்தூரில் உள்ள ஒரு அழகு நிலைய உரிமையாளர் மற்றும் அவரது கூட்டாளிகளிடமிருந்து அக்குழந்தை பெருந்தொகைக்கு விலைக்கு வாங்கப்பட்டது அம்பலமானது. நலிவடைந்த குடும்பங்களிலிருந்து குழந்தைகளைத் திருடி அல்லது விலைக்கு வாங்கி, தத்தெடுப்பு என்ற போர்வையில் விற்பனை செய்யும் ஒரு மிகப்பெரிய நெட்வொர்க் இதன்பின்னே செயல்படுவது கண்டறியப்பட்டுள்ளது. இந்த மோசடி கும்பலைச் சேர்ந்த பலரை ஏற்கனவே கைது செய்துள்ள போலீசார், குழந்தையின் உண்மையான பெற்றோரை அடையாளம் காணும் முயற்சியில் தீவிரமாக ஈடுபட்டுள்ளனர்.

இந்த விவகாரத்தில் அக்குழந்தையை விலைக்கு வாங்கிய தம்பதியினர் மீது குழந்தைக் கடத்தல் மற்றும் சிறார் நீதிச் சட்டத்தின் கீழ் கடுமையான வழக்குகள் பதியப்பட்டுள்ளன. மேலும், அக்குழந்தையைப் பராமரிக்க வைக்கப்பட்டிருந்த பெண் அளித்த வாக்குமூலத்தில், அந்தத் தம்பதியினர் குழந்தையை உடல்ரீதியாகத் துன்புறுத்தியதாகவும், சம்பளம் வழங்காததால் தான் பணியிலிருந்து வெளியேறியதாகவும் தெரிவித்துள்ளார். தற்போது நீதிமன்றக் காவலில் வைக்கப்பட்டுள்ள அந்தத் தம்பதியினரிடம், அக்குழந்தையின் பின்னணி மற்றும் இந்த மோசடி வலையமைப்பில் உள்ள மற்ற நபர்கள் குறித்து விரிவான விசாரணை நடத்தப்பட்டு வருகிறது.