உத்தரப் பிரதேச மாநிலம் மெயின்புரியைச் சேர்ந்த 16 வயது சிறுமி, குடும்பத்தினருடன் ஏற்பட்ட சிறு தகராறால் வீட்டை விட்டு வெளியேறி நொய்டாவிலுள்ள உறவினர் வீட்டிற்குச் செல்ல முடிவெடுத்தார். ஆகஸ்ட் 4-ஆம் தேதி இரவு, பலத்த மழைக்கு மத்தியில் அவர் தவறுதலாக பாரி சௌக் பகுதியில் இறங்கிவிட்டார். இருள் சூழ்ந்த நள்ளிரவில், தான் செல்ல வேண்டிய இடத்திற்குச் செல்ல பேருந்துக்காகக் காத்திருந்த போது, அங்கு வந்த காலியான தனியார் ஸ்லீப்பர் பேருந்து ஒன்றை உதவிக்காக அணுகியுள்ளார். அந்தப் பேருந்து நொய்டா செக்டர் 63-க்கு செல்வதாகக் கூறி, ஓட்டுநரும் நடத்துநரும் அந்தச் சிறுமியை வண்டியில் ஏற்றியுள்ளனர்.
உண்மையில் அந்தப் பேருந்து டெல்லியை நோக்கிச் சென்று கொண்டிருந்தது. பயணம் தொடங்கிய சற்று நேரத்திலேயே, பேருந்தில் வேறு பயணிகள் இல்லாததைப் பயன்படுத்திக் கொண்ட ஓட்டுநரும் நடத்துநரும் சிறுமியைக் கொலை செய்துவிடுவதாக மிரட்டி பாலியல் வன்கொடுமை செய்துள்ளனர். சுமார் 47 கிலோமீட்டர் தூரம் டெல்லியை நோக்கிப் பயணித்த அவர்கள், காஷ்மீரி கேட் பகுதியில் சிறுமியை அனாதையாக இறக்கிவிட்டுத் தப்பிச் சென்றனர். அந்த நள்ளிரவிலும் மனதைரியத்தை விடாத சிறுமி, நேரடியாகக் காஷ்மீரி கேட் காவல் நிலையத்திற்குச் சென்று தன் மீது நடத்தப்பட்ட கொடூரத் தாக்குதல் குறித்துப் புகார் அளித்தார்.
இந்த அதிர்ச்சியளிக்கும் புகாரைப் பெற்ற காவல்துறையினர், உடனடியாக சிசிடிவி காட்சிகளை ஆராய்ந்து விசாரணையைத் தீவிரப்படுத்தினர். குற்றவாளிகளான ஓட்டுநர் குல்தீப் மற்றும் நடத்துநர் சந்தீப் ஆகிய இருவரையும் டெல்லியில் கைது செய்ததோடு, தடயவியல் ஆய்விற்காக அந்தப் பேருந்தையும் பறிமுதல் செய்தனர். இந்தச் சம்பவம், பொதுப் போக்குவரத்தில் பெண்களின் பாதுகாப்பு குறித்தும், இரவு நேரப் பயணங்களில் ஜிபிஎஸ் போன்ற கண்காணிப்பு ஏற்பாடுகளின் அவசியத்தையும் மீண்டும் கேள்விக்குறியாக்கியுள்ளதுடன், 2012-ஆம் ஆண்டு நடந்த நிர்பயா சம்பவத்தின் வலியை மக்கள் மனதில் மீண்டும் எழுப்பியுள்ளது.