“தொட்டால் செத்துடுவோம்”…”கடற்கரையில் கிடந்த விசித்திரமான நீல நிற பொருள்… கையில் எடுத்த ஆராய்ச்சியாளருக்கு காத்திருந்த பேரதிர்ச்சி…!

ஜப்பானின் காமோ கடற்கரையில் ஆய்வாளர் யோஷிகி ஓச்சியாய் என்பவரால் தற்செயலாகக் கண்டறியப்பட்ட ஒரு விசித்திரமான கடல் உயிரினம், தற்போது உலக விஞ்ஞானிகளிடையே பெரும் அதிர்ச்சியை ஏற்படுத்தியுள்ளது. நீல நிறத்தில் ஜெல்லி மீன் போன்ற தோற்றமளிக்கும் இந்த உயிரினம், உண்மையில் ஒரு தனி உயிரினம் அல்ல; இது ‘சைபனோபோர்’ (Siphonophore) வகையைச் சேர்ந்தது. ‘சூயாய்ட்ஸ்’ எனப்படும் பல சிறு உயிரினங்களின் தொகுப்பான இதில், ஒவ்வொரு பகுதியும் உணவு தேடுதல், செரிமானம் மற்றும் மிதத்தல் போன்ற வெவ்வேறு பணிகளைச் செய்து ஒரு கூட்டு அமைப்பாகச் செயல்படுகின்றன.

இந்த புதிய இனத்திற்கு ஜப்பானிய நிலப்பிரபு டேட் மசாமுனேயின் ஹெல்மெட்டில் உள்ள பிறை நிலவு அடையாளத்தைக் குறிக்கும் வகையில் ‘மிகாசுகி’ எனப் பெயரிடப்பட்டுள்ளது. இதன் உடல் அமைப்பு மிகவும் தனித்துவமானது; இதன் மிதவை அமைப்பு மற்றவற்றிலிருந்து வேறுபடுவதோடு, ஒன்றுக்கும் மேற்பட்ட முதன்மை உணர்நீட்சிகளைக் கொண்டுள்ளது. மேலும், இதன் செரிமானப் பகுதி மஞ்சள் நிறத்தில், சிறிய வாழைப்பழம் போன்ற வடிவில் காட்சியளிக்கிறது. பொதுவாக வெப்பமண்டலக் கடல்களில் மட்டுமே வாழும் இத்தகைய உயிரினங்கள், வரலாற்றில் முதன்முறையாக ஜப்பானின் குளிர்ந்த வடக்குப் பகுதியான டோஹோகுவில் காணப்படுவது வியப்பை ஏற்படுத்தியுள்ளது.

இந்த இடப்பெயர்ச்சிக்கு முக்கியக் காரணமாக புவி வெப்பமடைதல் மற்றும் அதனால் ஏற்படும் கடல் நீரோட்ட மாற்றங்களே கருதப்படுகின்றன. மனிதர்களின் செயல்பாடுகளால் கடல் நீர் வெப்பமடைவதால், தெற்குப் பகுதியில் வாழும் நச்சுயிரிகள் தற்போது வடக்கு நோக்கி நகரத் தொடங்கியுள்ளன. இது சுற்றுச்சூழல் சமநிலையில் ஏற்பட்டுள்ள அபாயகரமான மாற்றத்தை உலகிற்கு உணர்த்தும் ஒரு எச்சரிக்கை மணியாகப் பார்க்கப்படுகிறது.

மிகவும் ஆபத்தான விஷத்தன்மையைக் கொண்ட இந்த ‘மிகாசுகி’, மனிதர்களுக்குப் புதிய அச்சுறுத்தலாக உருவெடுத்துள்ளது. இதனுடைய கொடுக்கில் இருக்கும் நச்சு கடுமையான வலியை உண்டாக்குவதோடு, சில நேரங்களில் உயிரிழப்பிற்கும் காரணமாகலாம். சிங்கம், புலி போன்ற விலங்குகள் மற்றும் வைரஸ் கிருமிகளுக்கு மத்தியில், கடலோரப் பகுதிகளில் மீன்பிடித் தொழில் செய்பவர்களுக்கும் சுற்றுலாப் பயணிகளுக்கும் இந்த புதிய உயிரினம் ஒரு கண்ணுக்குத் தெரியாத எமனாக மாறியிருப்பது விஞ்ஞானிகளைப் பெரும் கவலையில் ஆழ்த்தியுள்ளது.