“நான் சாகப்போறேன்” தற்கொலை செய்து உயிருக்கு போராடிய நபர்… உயிர் போய் திரும்பிய தருணம்…!!

புனே நகரின் கொண்ட்வா பகுதியில் குடும்பத் தகராறு காரணமாக நபர் ஒருவர் தனது உயிரை மாய்த்துக்கொள்ள முயன்றதாகக் காவல்துறைக்கு அவசர அழைப்பு வந்தது. தகவலைப் பெற்ற கொண்ட்வா காவல் நிலைய மார்ஷல் படைப் பிரிவைச் சேர்ந்த காவலர்கள் நிகாம் மற்றும் ரக்ஷே ஆகியோர் உடனடியாக மிதானகர் பகுதிக்கு விரைந்தனர். சம்பவ இடத்திற்குச் சென்றபோது, அந்த நபர் உயிருக்குப் போராடிக் கொண்டிருப்பதை அவர்கள் கண்டனர். ஒரு நொடியும் தாமதிக்காமல், காவலர்கள் அவருக்கு உடனடியாக முதலுதவி அளித்ததுடன், இதயத் துடிப்பை மீட்கும் சிபிஆர் சிகிச்சையையும் வழங்கினர்.

காவலர்களின் இந்தத் துரித முயற்சியால் அந்த நபரின் மூச்சு மீண்டும் திரும்பியது. உடனடியாக அவர் மேல் சிகிச்சைக்காக மருத்துவமனையில் அனுமதிக்கப்பட்டார். தற்போது அவர் அபாயக் கட்டத்தைத் தாண்டி சீரான நிலையில் உள்ளதாக மருத்துவர்கள் தெரிவித்துள்ளனர். உரிய நேரத்தில் செயல்பட்டு ஒரு உயிரைக் காப்பாற்றிய காவலர்கள் நிகாம் மற்றும் ரக்ஷே ஆகியோரின் மனிதநேயமிக்கச் செயலைப் புனே மாநகரக் காவல்துறையும், பொதுமக்களும் பாராட்டி வருகின்றனர்.