வழக்கமாக விநாயகப் பெருமானுக்கு லட்டு மற்றும் மோதகம் படைக்கப்படும் நிலையில், தாய்லாந்து தலைநகர் பாங்காக்கில் உள்ள பக்தர்கள் “போபா டீ” எனும் பானத்தை விநாயகருக்குப் படைக்கும் வினோதமான வழிபாட்டு முறையைப் பின்பற்றி வருகின்றனர். பாங்காக்கின் முக்கிய வணிக வளாகத்திற்கு வெளியே உள்ள விநாயகர் சன்னதியில், பக்தர்கள் இந்திய முறைப்படி பாரம்பரிய இனிப்புகளுக்குப் பதிலாகத் தங்களுக்குப் பிடித்தமான போபா டீயை வாங்கி வந்து படைக்கின்றனர்.
பியா பிங் என்ற இன்ஸ்டாகிராம் பயனர் பகிர்ந்துள்ள வீடியோ மூலம் இந்தத் தாய்லாந்து பண்பாட்டு வழக்கம் இணையத்தில் வைரலாகியுள்ளது. அங்குள்ள பக்தர்கள் தாங்கள் நினைத்த காரியம் நிறைவேறினால், நன்றிக்கடனாக மீண்டும் அந்தச் சன்னதிக்கு வந்து அதிக அளவில் போபா டீ கப்-களைக் கொண்டு வந்து படைக்கின்றனர். முதற்கட்டமாக 3 கப் படைக்கும் பக்தர்கள், தங்கள் பிரார்த்தனைகள் பலிக்கும் போது 6, 12 என அதிகரித்து, சிலர் 200 கப்கள் வரை கூடப் படைப்பதாக அவர் குறிப்பிட்டுள்ளார்.
https://www.instagram.com/reel/DdQOLfHBFqs/?utm_source=ig_web_button_share_sheet
இந்திய பாரம்பரிய வழிபாட்டு முறையும் தாய்லாந்து நாட்டின் உள்ளூர் கலாச்சாரமும் இணைந்து உருவான இந்த வித்தியாசமான முறை, சமூக வலைதளங்களில் பலரது கவனத்தையும் ஈர்த்துள்ளது. வழக்கமான மோதகங்களுக்குப் பதிலாக போபா டீ படைக்கப்படுவதைப் பார்த்து இந்திய நெட்டிசன்கள் ஆச்சரியமும் மகிழ்ச்சியும் அடைந்து வருகின்றனர்.