தமிழக அரசியலில் அண்மைக்காலமாக ஆளும் தமிழக வெற்றிக் கழகத்திற்கும், எதிர்க்கட்சிகளான திமுக மற்றும் அதிமுகவிற்கும் இடையே அரசியல் மோதல்கள் தீவிரமடைந்து வருகின்றன. ஸ்ரீவைகுண்டத்தில் தவெக பெண் நிர்வாகி ஒருவர் பாலியல் வன்கொடுமை செய்யப்பட்ட விவகாரம் தொடர்பாக, திமுகவின் உதயநிதி ஸ்டாலினும், அதிமுகவின் எடப்பாடி பழனிசாமியும் தவெக தலைவரும் முதலமைச்சருமான விஜய்யை நோக்கி கடுமையான விமர்சனங்களை முன்வைத்திருந்தனர். இந்த குற்றச்சாட்டுகளுக்கு தவெக-வின் தகவல் தொழில்நுட்ப அணி தற்போது மிகவும் காட்டமான மற்றும் காரசாரமான பதிலடியை தங்களது அதிகாரப்பூர்வ எக்ஸ் தள பக்கத்தில் வெளியிட்டு, அரசியல் வட்டாரத்தில் பெரும் பரபரப்பை ஏற்படுத்தியுள்ளது.
தவெக ஐடி விங் வெளியிட்டுள்ள அந்த விளக்கத்தில், ஸ்ரீவைகுண்டம் விவகாரத்தில் புகார் பெறப்பட்ட அடுத்த கணமே சம்பந்தப்பட்ட நபர் அதிரடியாகக் கைது செய்யப்பட்டு, சிறையிலடைக்கப்பட்டதாகக் குறிப்பிட்டுள்ளனர். பெண்களுக்கு எதிரான குற்றங்களில் ஈடுபடுபவர்கள் யாராக இருந்தாலும் இந்த தவெக அரசு சகித்துக்கொள்ளாது என்றும், தவறு செய்பவர்கள் எத்தகைய உயரிய பதவியில் இருந்தாலும் தப்பிக்க இயலாது என்றும் அவர்கள் திட்டவட்டமாகத் தெரிவித்துள்ளனர். மேலும், தங்களது அரசை ‘மாடர்ன் மனுநீதிச் சோழன் அரசு’ என்று வர்ணித்துள்ள தவெக, குற்றமற்றவர்கள் யாரும் பாதிக்கப்படாத வகையில் மிக நியாயமான முறையில் சட்டப்படி நடவடிக்கைகள் எடுக்கப்பட்டு வருவதாகக் கூறியுள்ளது.
எதிர்க்கட்சிகளின் விமர்சனங்களைச் சாடிய தவெக, திமுகவை “உதறல்நிதி” என்றும், அதிமுகவை “தீர்ந்துபோன சக்தி” என்றும் மிகக் கடுமையான வார்த்தைகளால் கிண்டல் செய்துள்ளது. அண்ணா பல்கலைக்கழகக் கொடூரச் சம்பவத்தில் பின்னணியில் இருந்த ‘யார் அந்த சார்?’ என்ற உண்மை குறித்து உதயநிதி பேசத் தயாரா என்றும், பொள்ளாச்சி பாலியல் கொடூரத்தில் நீதியைக் குழிதோண்டிப் புதைத்த அதிமுகவின் கடந்தகால செயல்பாடுகளையும் அவர்கள் ஒப்பிட்டு விமர்சித்துள்ளனர். ஆட்சி அதிகாரம் பறிபோன ஆத்திரத்தில் சித்தரஞ்சன் சாலை (திமுக) மற்றும் சிலுவம்பாளையம் (அதிமுக) ஆகிய இரு தரப்பும் இணைந்து தவெக அரசின் மீது பொறாமையால் பொய்ப் புகார்களைக் கூறி, காமெடி அரசியல் செய்து வருவதாகக் குற்றஞ்சாட்டியுள்ளனர்.
மறுபுறம், தமிழகத்தின் அரசியல் களம் பல்வேறு திருப்பங்களைச் சந்தித்து வருகிறது. தவெக தலைவர் விஜய் தனது டெல்லி பயணத்திற்கான தனியார் ஜெட் விமானச் செலவுகளைத் தனது சொந்தப் பணத்திலிருந்தே கையாண்டதாகக் கூறப்படும் நிலையில், வேலையில்லாத இளைஞர்களுக்கு மாதம் ரூ.4,000 வழங்கும் ‘VIP’ திட்டத்தையும் அவர் கையில் எடுத்துள்ளார். இதற்கிடையே, அமைச்சர் ஆதவ் அர்ஜுனாவை பதவியிலிருந்து நீக்க வேண்டும் என டாக்டர் கிருஷ்ணசாமி கோரிக்கை விடுத்துள்ளார். மேலும், காங்கிரஸ் கட்சியில் செல்வப்பெருந்தகைக்கு மாற்றாக மாணிக்கம் தாகூரை களம் இறக்க அக்கட்சியின் மேலிடம் மாஸ்டர் பிளான் போட்டு வருவதோடு, ஆர்.எஸ்.பாரதி விவகாரத்தில் மாணிக்கம் தாகூரின் கிண்டலான விமர்சனங்களும் தற்போது தமிழக அரசியலை மேலும் சூடாக்கியுள்ளன.