அமெரிக்காவில் உணவகங்களில் இருந்து ‘டோர் டேஷ்’ செயலி வழியாக உணவு ஆர்டர் செய்தால், மனிதர்களுக்குப் பதிலாக ரோபோக்கள் மூலமாக உணவு விநியோகிக்கப்படும் புதிய நடைமுறை பின்பற்றப்பட்டு வருகிறது. இது குறித்து சமூக வலைதளத்தில் பதிவிட்ட பயனர் ஒருவர், அமெரிக்காவில் கியூ ஆர் குறியீட்டை ஸ்கேன் செய்து கட்டணம் செலுத்தி உணவைப் பெற்றுக்கொள்ளலாம் என்றும், ஆனால் இத்தகைய தொழில்நுட்பம் இந்தியாவில் அறிமுகமானால் முதல் ஆர்டரிலேயே ரோபோவே காணாமல் போய்விடும் என்றும் கிண்டலாகக் குறிப்பிட்டிருந்தார்.
இப்பதிவு இணையத்தில் பெரும் விவாதத்தை ஏற்படுத்திய நிலையில், பலரும் இதற்குத் தங்களது கருத்துகளைப் பதிவிட்டு வருகின்றனர். ரோபோக்களில் கண்காணிப்புக் கேமராக்கள் பொருத்தப்பட்டிருப்பதால் அவற்றை யாரும் சேதப்படுத்தவோ திருடவோ முடியாது என்று சிலர் விளக்கமளித்தனர். அதேவேளையில், எந்தவொரு நவீன தொழில்நுட்பமும் வெற்றிபெற மக்களின் நேர்மையும் பொறுப்புணர்வும் மிக முக்கியம் என்றும், மக்களின் எண்ண ஓட்டமே நாட்டின் வளர்ச்சிக்கும் தொழில்நுட்பத்தின் பயன்பாட்டிற்கும் முக்கியக் காரணியாக அமைகிறது என்றும் நெட்டிசன்கள் கருத்து தெரிவித்து வருகின்றனர்.