புளோரிடாவைச் சேர்ந்த டடியானா நார்மன் என்ற தாய், தனது 6 மாத குழந்தை ஜெரெமியாவை மூர்க்கத்தனமாக விளையாட்டுத் தொட்டிலுக்குள் தூக்கி எறிந்ததால் குழந்தை உயிரிழந்ததாக நீதிமன்ற ஆவணங்கள் தெரிவிக்கின்றன. கடந்த ஜூன் 29 அன்று இரவு லேக்லாந்தில் உள்ள அவரது வீட்டில் குழந்தை சுயநினைவின்றி இருந்ததை அடுத்து காவல்துறையினர் நார்மனைப் பிடித்துள்ளனர். ஆரம்பத்தில், குழந்தை சூடான நீரில் குளித்ததால் காயம் ஏற்பட்டது என்றும், படுக்கையில் இருந்து தவறி விழுந்தது என்றும் அல்லது தாங்கள் குழந்தையின் மீது உருண்டு விழுந்திருக்கலாம் என்றும் அவர் முரண்பாடான தகவல்களைக் கூறினார். ஆனால், பிரேதப் பரிசோதனையில் குழந்தையின் தொடையில் தீவிர வெப்பக் காயமும், தலையில் கடுமையான அடிபட்ட காயங்களும் இருந்தது தெரியவந்தது.
பிரேதப் பரிசோதனை முடிவுகளுக்குப் பிறகு உண்மையை ஒப்புக்கொண்ட தாய், அன்று காலை ரிமோட் எடுக்கும்போது குழந்தை தரையில் விழுந்ததாகவும், பின்னர் தொட்டில் கவிழ்ந்து கீழே விழுந்ததாகவும் கூறியுள்ளார். தொடர்ந்து, பிற்பகல் 1 மணியளவில் பொறுமையிழந்த நார்மன், குழந்தையைச் சில அடி தூரத்திலிருந்து விளையாட்டுத் தொட்டிலுக்குள் தூக்கி எறிந்துள்ளார். இதனால் மெத்தையிடப்படாத பகுதியில் குழந்தையின் தலை மற்றும் முதுகில் பலத்த காயம் ஏற்பட்டுள்ளது. குழந்தை காயமடைந்த பிறகு மருத்துவமனைக்கு அழைத்துச் செல்லாமல், மூளையதிர்ச்சி குறித்த அறிகுறிகளைக் கூகிளில் தேடிவிட்டு, குழந்தையை வீட்டிலேயே கண்காணிக்க முடிவு செய்துள்ளார்.
குழந்தையின் நிலைமை தொடர்ந்து மோசமடைந்து உயிருக்குப் போராடிக் கொண்டிருந்த நிலையில், நார்மன் எந்தவித குற்ற உணர்ச்சியுமின்றி பல மணி நேரம் டிக்டாக் வீடியோக்களையும், 30க்கும் மேற்பட்ட முறை ஆபாச இணையதளங்களையும் பார்த்து நேரத்தைக் கழித்துள்ளார். காவல்துறைக்குத் தகவல் தெரிவிப்பதற்கு முன்பே குழந்தை உயிரிழந்திருக்கலாம் என அதிகாரிகள் தெரிவிக்கின்றனர். மனச்சோர்வு மற்றும் பார்டர்லைன் ஆளுமைக் கோளாறு காரணமாகவே பொய் கூறியதாகக் குறிப்பிட்ட நார்மன் மீது கடுமையான குழந்தை துன்புறுத்தல் வழக்குப்பதிவு செய்யப்பட்டுள்ளது. அவருக்கு 30 ஆண்டுகள் வரை சிறைத்தண்டனை விதிக்கப்பட வாய்ப்புள்ள நிலையில், குற்றச்சாட்டுகள் மேலும் அதிகரிக்கப்படலாம் என்றும் காவல்துறை தெரிவித்துள்ளது.