உத்தரப் பிரதேச மாநிலம் ஓரையா மாவட்டத்தில் உள்ள ஒரு கிராமத்தில், தாய் குரங்கு ஒன்று தனது இறந்த குட்டியை மடியில் கிடத்தி, அதற்கு உயிர் கொடுக்க போராடும் நெஞ்சை உருக்கும் வீடியோ சமூக வலைதளங்களில் வைரலாகி வருகிறது. மனிதர்களைப் போலவே விலங்குகளும் தங்கள் பிள்ளைகள் மீது வைத்திருக்கும் அளவற்ற பாசத்தையும், பிரிவால் ஏற்படும் தவிப்பையும் இந்த வீடியோ பார்ப்பவர் நெஞ்சங்களை உருக வைத்துள்ளது.
அந்த வீடியோவில், குட்டி குரங்கு இறந்துவிட்டதை உணராத அந்தத் தாய் குரங்கு, அதன் உடலைக் கட்டியணைத்துக் கொண்டும், அதன் முகத்தைத் தடவிக்கொடுத்தும், எப்படியாவது எழுந்துவிடாதா என்ற ஏக்கத்துடன் காணப்படுகிறது. சுற்றியுள்ள மக்கள் அதைக் கவனித்து அதற்கு உணவு மற்றும் தண்ணீர் கொடுக்க முயன்றபோதும், அதையெல்லாம் பொருட்படுத்தாமல் தனது முழு கவனத்தையும் இறந்த குட்டியின் மீதே வைத்து கதறி அழுதுகொண்டிருக்கிறது.
விலங்குகளின் உணர்ச்சிகரமான பக்கத்தை வெளிப்படுத்தும் இந்த வீடியோவை நெட்டிசன்கள் பலரும் பகிர்ந்து, “தாயின் பாசத்திற்கு மனிதன், மிருகம் என்ற பாகுபாடே இல்லை” என்று உருக்கமாகக் கருத்து தெரிவித்து வருகின்றனர். பார்ப்போரின் கண்களைக் குளமாக்கும் இந்தத் தாய்ப் பாசக் காட்சி, சமூக ஊடகங்களில் தற்போது பெரும் சோகத்தையும் விவாதத்தையும் ஏற்படுத்தியுள்ளது.