சமூக ஊடகங்களில் வைரலாகி வரும் ஒரு வீடியோ பலரது கவனத்தை ஈர்த்துள்ளது. அந்த வீடியோவில், உயரமான ஒரு அடுக்குமாடி குடியிருப்புக் கட்டிடத்திலிருந்து லேப்டாப் ஒன்று திடீரென கீழே விழுகிறது. சாலையில் மிக வேகமாக வந்து விழும் அந்த லேப்டாப், பலத்த சத்தத்துடன் மோதி நொறுங்கி, அதன் பாகங்கள் சிதறிப் போகின்றன. பெங்களூருவில் நடந்ததாகக் கூறப்படும் இந்தச் சம்பவம் காண்போரைக் திடுக்கிடச் செய்யும் வகையில் அமைந்துள்ளது.
இந்த அதிர்ச்சிகரமான சம்பவத்திற்கு அடுத்த சில நொடிகளில், ஒரு இளம் பெண் பதற்றத்துடன் சம்பவ இடத்திற்கு ஓடி வருகிறார். கீழே சிதறிக்கிடக்கும் லேப்டாப் பாகங்களைப் பார்த்து மிகுந்த கவலையடையும் அவர், உடனடியாகத் தனது மொபைல் போனை எடுத்து யாருக்கோ அவசரமாக அழைக்கிறார். அந்தப் பெண்ணின் முகபாவனைகளும் பயமும் அந்த லேப்டாப் அவருடையதாகத்தான் இருக்க வேண்டும் என்பதை உணர்த்துகிறது.
இருப்பினும், அந்த லேப்டாப் கட்டிடத்திலிருந்து எப்படி கீழே விழுந்தது என்ற விவரம் வீடியோவில் தெளிவாகத் தெரியவில்லை. அது தவறுதலாகக் கையை விட்டு நழுவி விழுந்ததா அல்லது வேறு ஏதேனும் காரணமா என்ற மர்மம் நீடிக்கிறது. இந்த வீடியோவிற்கு சமூக வலைத்தளங்களில் நெட்டிசன்கள் பல்வேறு கருத்துக்களைப் பகிர்ந்து வருகின்றனர். சிலர் அந்தப் பெண்ணின் இழப்பிற்குத் தங்களின் அனுதாபங்களைத் தெரிவித்து வரும் வேளையில், மற்ற சிலர் “பெங்களூருவில் மழைக்கு பதிலாக லேப்டாப் பொழிகிறது” என்பது போன்ற நகைச்சுவையான கமெண்ட்டுகளையும் பதிவிட்டு வருகின்றனர்.