கோவை மலுமிச்சம்பட்டி சிக்னல் பகுதியில் பச்சிளம் குழந்தைகளைப் பயன்படுத்தி ஒரு கும்பல் பிச்சை எடுத்து வந்துள்ளது. இதனை கவனித்த அப்பகுதியைச் சேர்ந்த நேதாஜி நண்பர்கள் நற்பணி மன்ற இளைஞர்கள், உடனடியாகச் செயல்பட்டு அந்த கும்பலைப் பிடித்து, அவர்களிடம் இருந்த குழந்தைகளை மீட்டனர். இதுகுறித்து அவர்கள் உடனடியாக காவல் துறைக்கும், மாவட்ட குழந்தைகள் பாதுகாப்புப் பிரிவிற்கும் தகவல் தெரிவித்து ஒப்படைத்தனர்.
மீட்கப்பட்ட பச்சிளம் குழந்தைகள் அனைவரும் நேற்று மாவட்ட குழந்தைகள் காக்கும் மையத்தில் பாதுகாப்பாக ஒப்படைக்கப்பட்டனர். இதற்கிடையில், குழந்தைகளைக் காட்டி பிச்சை எடுக்க வைத்த பெண்களைப் பிடித்து போலீசார் தீவிர விசாரணை நடத்தி வருகின்றனர். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.