மகாராஷ்டிரா மாநிலம் புனேவை அடுத்த பிம்ப்ரி-சிஞ்ச்வாட் பகுதியில், நள்ளிரவில் மூன்று அடையாளம் தெரியாத நபர்கள் சேர்ந்து தெருவில் நின்றிருந்த பசு மாடு ஒன்றை காரில் ஏற்றித் திருடிச் செல்லும் அதிர்ச்சி சம்பவம் நிகழ்ந்துள்ளது. இந்தத் திருட்டுச் சம்பவம் முழுவதும் அப்பகுதியில் பொருத்தப்பட்டிருந்த சிசிடிவி கேமராவில் தெளிவாகப் பதிவாகி, தற்போது சமூக வலைதளங்களில் வைரலாகி வருகிறது.
பசுவின் உரிமையாளர் அளித்த புகாரின் அடிப்படையில், பிம்ப்ரி காவல் துறையினர் மூன்று நபர்கள் மீது வழக்குப் பதிவு செய்து தீவிர விசாரணை மேற்கொண்டு வருகின்றனர். குற்றவாளிகளையும், திருட்டிற்குப் பயன்படுத்தப்பட்ட வாகனத்தையும் அடையாளம் காண்பதற்காகச் சுற்றியுள்ள பிற பகுதிகளின் கண்காணிப்பு கேமரா பதிவுகளை அதிகாரிகள் ஆய்வு செய்து வருகின்றனர். மேலும், அந்த பசு மாடு விற்பனைக்காகவோ அல்லது சட்டவிரோதக் கடத்தலுக்காகவோ திருடப்பட்டதா என்ற கோணத்திலும் காவல்துறையினர் விசாரித்து வருகின்றனர்.
நள்ளிரவில் காரிலேயே வந்து மாட்டைத் தூக்கிச் சென்ற இச்சம்பவம் அப்பகுதி மக்களிடையே பெரும் அதிர்ச்சியையும் பாதுகாப்பற்ற உணர்வையும் ஏற்படுத்தியுள்ளது. சமூக வலைதளங்களில் இந்த வீடியோவைப் பார்த்த இணையவாசிகள், “இதுவரை பைக், கார்களைத் திருடியவர்கள், இப்போது வாயில்லாப் பிராணிகளையும் விட்டுவைக்காமல் திருடத் தொடங்கிவிட்டனர்” எனக் கவலையுடன் கருத்துகளைப் பதிவிட்டு வருகின்றனர்.