திமுக முன்னாள் அமைச்சரின் உதவியோடு இயங்கும் ஒரு தனியார் மதுபான ஆலைக்கு, மதுவிலக்கு மற்றும் ஆயத்தீர்வை துறை அமைச்சர் விக்னேஷ் சட்டரீதியான கெடுபிடிகளை தீவிரப்படுத்தியதாகத் தகவல்கள் வெளியாகியுள்ளன. விதிகளுக்குப் புறம்பாகச் செயல்பட்ட அந்த ஆலைக்கு கோடிக்கணக்கில் அபராதம் விதித்ததோடு, தயாரிப்பைத் தொடர முடியாதவாறு ஒரு வார காலத் தடையும் அவர் விதித்துள்ளார்.
இதனால் பெரும் நிதியிழப்பைச் சந்தித்த அந்த ஆலையின் நிர்வாகம், கொங்கு மண்டலத்தைச் சேர்ந்த திமுகவின் முன்னாள் முக்கியப் புள்ளி ஒருவரின் ஆதரவை நாடியுள்ளது. இருவரும் இணைந்து, அமைச்சரின் நடவடிக்கைகளை முடக்கும் நோக்கில், அவரை டாஸ்மாக் துறையிலிருந்து வேறு துறைக்கு மாற்ற வைத்தாக வேண்டும் என்று ஆளுங்கட்சியின் தலைமை மட்டத்திலேயே தீவிரமான உள்ளடி வேலைகளிலும் அரசியல் அழுத்தங்களிலும் ஈடுபட்டு வருவதாக அறிவாலய வட்டாரங்களில் பேச்சு அடிபடுகிறது.