சமீபத்தில் சத்தீஸ்கரின் கபீர்தாம் மாவட்டம் பண்டதராய் அருகே, டெல்லியைச் சேர்ந்த சாஹில் மன்சூரி மற்றும் சங்கி ஆகிய தம்பதியினர் நள்ளிரவில் காரில் சென்றபோது எதிர்பாராதவிதமாக கார் ஹாஃப் ஆற்றில் விழுந்து விபத்துக்குள்ளானது. ஜபல்பூர் வழியாக கோர்பாவில் உள்ள பெண்ணின் பெற்றோர் வீட்டிற்குச் சென்று கொண்டிருந்தபோது இந்த அசம்பாவிதம் நடந்துள்ளது. விபத்து நடந்த சமயத்தில் அந்தப் பகுதியில் கடும் இருளும், கனமழையும் இருந்ததால், சாலை சரியாகத் தெரியாமல் கார் கட்டுப்பாட்டை இழந்து ஆற்றில் பாய்ந்ததாகப் பாதிக்கப்பட்ட பெண் தரப்பில் தெரிவிக்கப்பட்டுள்ளது. அதிர்ஷ்டவசமாக, அவ்வழியே வந்த ஆம்புலன்ஸ் ஊழியர்கள் ஆற்றில் மூழ்கிய காரில் இருந்து தம்பதியை மீட்டு மருத்துவமனைக்கு அனுப்பி வைத்தனர்.
இருப்பினும், இந்த விபத்துக்குப் பிறகு தம்பதியினர் மீட்கப்படும் வீடியோ இணையத்தில் வைரலாக பரவியது. அதில் அவர்கள் அரைகுறை ஆடைகளுடன் இருந்ததைக் கண்ட சில நெட்டிசன்கள், காரில் ரொமாண்டிக் பாடல் ஒலிக்க தம்பதியினர் காருக்குள் ரொமான்ஸ் செய்துகொண்டே கார் ஓட்டியதால்தான் இந்த விபத்து நேர்ந்தது என்ற வதந்தியைப் பரப்பத் தொடங்கினர். நள்ளிரவுப் பயணம் மற்றும் மழையின் காரணமாக அவர்கள் சாதாரண வீட்டு உடைகளில் இருந்திருக்கலாம் என்ற எதார்த்தத்தை மறைத்து, சமூக ஊடகங்களில் இந்த விபத்திற்குப் பின்னால் தவறான கதைகள் ஜோடிக்கப்பட்டன.
நெட்டிசன்களின் இந்த ஆதாரமற்ற குற்றச்சாட்டுகளைப் பலரும் சமூக வலைத்தளங்களில் கடுமையாக விமர்சித்து வருகின்றனர். பிற்போக்குத்தனமான கருத்துகளையும், வதந்திகளையும் பரப்பும் நோக்கில் மட்டுமே இத்தகைய தவறான தகவல்கள் பகிரப்படுவதாகவும், கனமழை மற்றும் போதிய வெளிச்சமின்மையே விபத்துக்கு உண்மையான காரணம் என்றும் விபத்தை ஆராய்ந்த விவேகமுள்ள நெட்டிசன்கள் தெளிவுபடுத்தியுள்ளனர். எனவே, சமூக ஊடகங்களில் பரவும் இதுபோன்ற ஆதாரமற்ற வதந்திகளைப் பொதுமக்கள் யாரும் நம்ப வேண்டாம் என்று கேட்டுக்கொள்ளப்படுகிறார்கள்.