பீகார் மாநிலம் முங்கீர் மாவட்டம் பக்கர்பூர் பகுதியில் காவல்துறையினர் தீவிர வாகன சோதனையில் ஈடுபட்டிருந்தனர். அப்போது அந்த வழியாக சந்தேகத்திற்கிடமான வகையில் இருசக்கர வாகனத்தில் வந்த நபர் ஒருவரை போலீசார் மறித்துச் சோதனை செய்தனர்.
அந்த நபரின் முதுகில் பெரிய அளவிலான ஆயுதம் மறைத்து வைக்கப்பட்டிருப்பது சோதனையில் தெரியவந்தது. இதையடுத்து போலீசார் அந்த நபரின் கை, கால்களைக் கட்டி அவரிடமிருந்த ஆயுதத்தைக் கைப்பற்றினர். விசாரணையில் அது சட்டவிரோதமாகக் கொண்டு செல்லப்பட்ட நாட்டுத் துப்பாக்கி என்பது உறுதியானது.
மேலும் அந்த நபரிடமிருந்து சுமார் 30 முதல் 40 நேரடித் தோட்டாக்கள் கொண்ட பாக்கெட்டையும், கடத்தலுக்குப் பயன்படுத்திய இருசக்கர வாகனத்தையும் போலீசார் பறிமுதல் செய்தனர். இது தொடர்பாக வழக்குப் பதிவு செய்துள்ள காவல்துறையினர், அந்த நபரை கைது செய்து அவருக்கு இந்த சட்டவிரோத ஆயுதம் எங்கிருந்து கிடைத்தது என்பது குறித்துத் தீவிர விசாரணை நடத்தி வருகின்றனர்.