இனி போர் கிடையாது… இஸ்ரேல் – அமெரிக்காவுக்கு செக்.. ஈரான் போட்ட 3 ‘மெகா’ கண்டிஷன்கள்…. அடிபணியுமா வல்லரசு நாடுகள்..?

மத்திய கிழக்கில் அமெரிக்கா மற்றும் இஸ்ரேல் படைகளுக்கும் ஈரானுக்கும் இடையே போர் தீவிரமடைந்து வரும் நிலையில், அமைதியை நிலைநாட்ட ஈரான் அதிபர் மசூத் பெசெஷ்கியன் மூன்று முக்கிய நிபந்தனைகளை முன்வைத்துள்ளார். ரஷியா மற்றும் பாகிஸ்தான் தலைவர்களுடன் இது குறித்து ஆலோசனை நடத்திய அவர், பிராந்தியத்தில் அமைதியை நிலைநாட்ட ஈரான் விரும்புவதாகவும், ஆனால் அதற்குத் தங்கள் தரப்பு நியாயமான கோரிக்கைகள் ஏற்கப்பட வேண்டும் என்றும் வலியுறுத்தியுள்ளார்.

ஈரான் தரப்பில் முன்வைக்கப்பட்டுள்ள முதல் நிபந்தனை, அந்நாட்டின் அடிப்படை உரிமைகள் மற்றும் இறையாண்மையை சர்வதேச நாடுகள் அங்கீகரிக்க வேண்டும் என்பதாகும். அணுசக்தி ஒப்பந்தங்கள் மற்றும் சர்வதேச விதிகளின்படி ஈரானுக்கு வழங்கப்பட்டுள்ள உரிமைகளைத் தடையின்றி பயன்படுத்த அனுமதிக்க வேண்டும் என்று ஈரான் வலியுறுத்துகிறது. இதனை அடிப்படையாகக் கொண்டே போரை நிறுத்தத் தயாராக இருப்பதாகத் தெரிவிக்கப்பட்டுள்ளது.

இரண்டாவதாக, தற்போது நடைபெற்று வரும் ராணுவத் தாக்குதல்களால் ஈரானுக்கு ஏற்பட்டுள்ள உயிர் மற்றும் சொத்து சேதங்களுக்கு உரிய இழப்பீடு வழங்கப்பட வேண்டும் என்று கோரப்பட்டுள்ளது. அமெரிக்கா மற்றும் இஸ்ரேலின் வான்வழித் தாக்குதல்களால் பல குடியிருப்புப் பகுதிகள் மற்றும் அரசு அலுவலகங்கள் சேதமடைந்துள்ள நிலையில், இந்த நிபந்தனை மிக முக்கியமானதாகக் கருதப்படுகிறது. ஈரானின் உயர்மட்டத் தலைவர்கள் இழப்பீடு கோருவது இதுவே முதல் முறை என்பது குறிப்பிடத்தக்கது.

மூன்றாவது மற்றும் இறுதியான நிபந்தனையாக, எதிர்காலத்தில் ஈரான் மீது மீண்டும் இத்தகைய தாக்குதல்கள் நடத்தப்படாது என்பதற்குச் சர்வதேச அளவில் உறுதியான உத்தரவாதம் அளிக்கப்பட வேண்டும் என்று ஈரான் கேட்டுள்ளது. ‘போர்-பேச்சுவார்த்தை-போர் நிறுத்த ஒப்பந்தம்-மீண்டும் போர்’ என்ற சுழற்சியை உடைக்க விரும்புவதாகவும், ஐநா சபையின் மூலம் பாதுகாப்பு உறுதி செய்யப்பட வேண்டும் என்றும் பெசெஷ்கியன் குறிப்பிட்டுள்ளார். இருப்பினும், இந்தப் போர் அண்மையில் முடிவுக்கு வரும் அறிகுறிகள் தென்படவில்லை எனப் பாதுகாப்பு நிபுணர்கள் கருதுகின்றனர்.