தமிழக அரசியல் களம் 2026 சட்டமன்றத் தேர்தலை நோக்கி இப்போதே சூடுபிடிக்கத் தொடங்கியுள்ளது. ஆளுங்கட்சியான திமுக தனது கூட்டணியைத் தக்கவைக்கப் போராடி வரும் வேளையில், எதிர்க்கட்சியான அதிமுக வியூகங்களை மாற்றி அமைத்து கூட்டணியை வலுப்படுத்துவதில் மும்முரம் காட்டி வருகிறது. குறிப்பாக, தென் மாவட்டங்களான திருநெல்வேலி மற்றும் கன்னியாகுமரியில் கணிசமான வாக்கு வங்கியைப் பெற்றுள்ள என்.ஆர். தனபாலன் தலைமையிலான பெருந்தலைவர் மக்கள் கட்சி, திமுக கூட்டணிக்குச் செல்லும் என்று எதிர்பார்க்கப்பட்டது. இதற்கான பேச்சுவார்த்தைகள் திரைமறைவில் நடந்து வந்ததாகக் கூறப்பட்ட நிலையில், தற்போது நிலைமை தலைகீழாக மாறியுள்ளது.
திமுக தலைமைக்கு பெரும் அதிர்ச்சி அளிக்கும் வகையில், பெருந்தலைவர் மக்கள் கட்சியின் தலைவர் என்.ஆர். தனபாலன், அதிமுக பொதுச்செயலாளர் எடப்பாடி பழனிசாமியை நேரில் சந்தித்து தனது ஆதரவைத் தெரிவித்துள்ளார். வரும் 2026 தேர்தலில் அதிமுகவுடன் இணைந்து செயல்படப் போவதாக அவர் அறிவித்திருப்பது, தென் தமிழகத்தில் அதிமுகவின் கரத்தை வலுப்படுத்தியுள்ளது. தொகுப் பங்கீடு மற்றும் கூட்டணிப் பேச்சுவார்த்தைகளில் திமுக கூட்டணியில் இழுபறி நீடித்து வரும் சூழலில், இந்தத் திடீர் திருப்பம் ஆளுங்கட்சிக்கு ஒரு பின்னடைவாகவும், அதிமுகவிற்கு ஒரு உற்சாகமாகவும் பார்க்கப்படுகிறது.