சாதாரண சளி, காய்ச்சல்னு நினைச்சாங்க.. ஆனா எக்ஸ்ரே-வில் காத்திருந்த பேரதிர்ச்சி..! உ.பி-யில் நெஞ்சை பதறவைத்த சம்பவம்…!!

உத்தரப் பிரதேச மாநிலம் அம்பேத்கர் நகரில், ஒன்றரை வயதுக் குழந்தையின் மூச்சுக்குழாயில் கடந்த 25 நாட்களாகச் சிக்கியிருந்த 2 இன்ச் நீளமுள்ள டூத்பிரஷ் , மருத்துவர்களால் அறுவை சிகிச்சை மூலம் வெற்றிகரமாக அகற்றப்பட்டுள்ளது. கட்கா காவல் எல்லைக்குட்பட்ட புல்வாரி கிராமத்தைச் சேர்ந்த கோவிந்த் குமார் என்பவரின் ஒன்றரை வயது மகன் ஆயுஷ், கடந்த மே 4-ஆம் தேதி வீட்டில் டூத்பிரஷ்ஷுடன் விளையாடிக்கொண்டிருந்தபோது குப்புற விழுந்துள்ளான். அப்போது அவனது வாயிலிருந்த பிரஷ்ஷின் முன்பகுதி எதிர்பாராதவிதமாக மூச்சுக்குழாய்க்குள் சென்று சிக்கிக்கொண்டது.

குழந்தை அழுதபோது, கீழே விழுந்த அதிர்ச்சியால் அழுகிறான் என்று நினைத்த தாய், அருகில் உள்ள மருத்துவரிடம் அழைத்துச் சென்றுள்ளார். அந்த மருத்துவர் தொண்டையில் வீக்கம் இருப்பதாகக் கூறி மருந்து கொடுத்துள்ளார். ஆனால், குழந்தையின் நிலைமை சரியாகாமல் காய்ச்சல் மற்றும் சளி ஏற்பட்டுள்ளது. 23 நாட்களாகப் பெற்றோர் தொண்டை வீக்கத்திற்கான மருந்தையே கொடுத்து வந்த நிலையில், குழந்தையின் உடல்நிலை மோசமடைந்ததை அடுத்து, அவர்கள் குழந்தையை காது, மூக்கு, தொண்டை பிரிவுக்கு அழைத்துச் சென்றனர். அங்கு எடுக்கப்பட்ட சிடி ஸ்கேனில் குழந்தையின் மூச்சுக்குழாயில் டூத்பிரஷ் சிக்கியிருப்பது வெளிச்சத்திற்கு வந்தது.

நீண்ட நாட்களாக பிரஷ் உள்ளே இருந்ததால், அதைச் சுற்றி தசைப் படலம் உருவாகியிருந்ததுடன், குழந்தையின் நெஞ்சுப் பகுதியிலும் தொற்று ஏற்பட்டிருந்தது. இதனையடுத்து, சுமார் 7 மருத்துவர்கள் கொண்ட குழுவினர் முதலில் நெஞ்சுத் தொற்றைக் குணப்படுத்தி, பின்னர் வெள்ளிக்கிழமை அன்று குழந்தைக்கு அதிநவீன அறுவை சிகிச்சை செய்து டூத்பிரஷ்ஷை வெளியே எடுத்தனர். தற்போது குழந்தை நலமாக இருப்பதாகவும், அடுத்த 48 மணி நேரத்திற்கு மருத்துவர்களின் தீவிர கண்காணிப்பில் வைக்கப்பட்டுள்ளதாகவும் தெரிவிக்கப்பட்டுள்ளது.