ஈரோடு மாவட்டம் புளியம்பட்டி அருகே கோவை எல்லைப்பகுதியில் அமைந்துள்ள இடுகம்பாளையத்தில், ஆயிரம் ஆண்டுகள் பழமை வாய்ந்த ஜெயமங்கள ஆஞ்சநேயர் திருக்கோவில் அமைந்துள்ளது. இயற்கை எழில் சூழ்ந்த பகுதியில் அமைந்துள்ள இக்கோவில், ‘இடர்களைக் களையும் இடுகம்பாளையம் ஆஞ்சநேயர் கோவில்’ என்றும் பக்தர்களால் போற்றப்படுகிறது. இங்கு அனுமன் சன்னதியுடன் விநாயகர், ராமலிங்கேஸ்வரர் மற்றும் பர்வதவர்தனி அம்மன் ஆகியோருக்கும் தனித்தனி சன்னதிகள் உள்ளன. நவகிரக தோஷங்களை நீக்கி, மும்மூர்த்திகளின் அருளையும் ஒருசேரத் தரும் புனிதத் தலமாக இது விளங்குகிறது.
திருமணத் தடை நீங்கவும், புத்திர பாக்கியம் கிடைக்கவும் இக்கோவிலுக்கு வரும் பக்தர்களின் எண்ணிக்கை அதிகம். வேண்டுதல் நிறைவேற விரும்புவோர், தினசரி ஒரு கைப்பிடி அரிசியைத் தனியாகச் சேர்த்து, முப்பது நாட்கள் முடிந்ததும் அதனை இக்கோவிலில் சமர்ப்பிக்கின்றனர். இவ்வாறு காணிக்கையாகப் பெறப்படும் அரிசியைக் கொண்டு கோவிலுக்கு வரும் பக்தர்களுக்குத் தினந்தோறும் அன்னதானம் வழங்கப்படுகிறது. காலை 6 மணி முதல் இரவு 8 மணி வரை திறந்திருக்கும் இந்த ஆலயம், மன அமைதி தேடும் ஆன்மிகப் பயணிகளுக்கு ஒரு சிறந்த இடமாகும்.