செஞ்சி வட்டம் ஆலம்பூண்டி குளக்கரை தெருவைச் சேர்ந்த கூலித் தொழிலாளி வடிவேலு – பவானி தம்பதியின் 7 வயது மகள் ஹேமலதா மாயமான சம்பவம் நடந்து இன்றுடன் 28 நாட்கள் முடிவடைந்துவிட்டன. அக்டோபர் 11 அன்று இரவு தனது பிறந்தநாளைக் கொண்டாடிவிட்டு உறங்கிய குழந்தை நள்ளிரவில் திடீரெனக் காணாமல் போன இந்தச் சம்பவம், தமிழகம் முழுவதும் பெரும் அதிர்ச்சியை ஏற்படுத்தியுள்ளது. உள்ளூர் காவல் துறையினர் 10 நாட்கள் தேடியும் எந்தத் துப்பும் கிடைக்காததால், பொதுமக்களின் போராட்டத்தைத் தொடர்ந்து இந்த வழக்கு சிபிசிஐடி வசம் மாற்றப்பட்டது.
வழக்கைக் கையில் எடுத்த சிபிசிஐடி அதிகாரிகள் முதல் இரண்டு வாரங்களில் பல்வேறு கோணங்களில் தீவிர விசாரணை நடத்தினர். முன்னாள் ஊராட்சி மன்றத் தலைவரின் தற்கொலை முயற்சி, சாமியார் சரவணனின் தலைமறைவு, ரவுடி ராஜதுரையிடம் பலமுறை விசாரணை மற்றும் 600-க்கும் மேற்பட்ட செல்போன் கோபுர அழைப்புகள் ஆய்வு என ஆரம்பத்தில் அதிரடி காட்டப்பட்டது. நாமக்கல், நள்ளிரவு சுடுகாட்டு ஆய்வுகள் மற்றும் உளவுத்துறை முகாம்கள் எனப் பல திசைகளில் தேடுதல் வேட்டை தீவிரப்படுத்தப்பட்டது.
ஆனால், கடந்த சில நாட்களாக இவ்வழக்கில் எந்தவொரு குறிப்பிடத்தக்க நகர்வும் முன்னேற்றமும் இன்றி ஒட்டுமொத்தப் புலனாய்வும் அப்படியே தேங்கிப் போய் நிற்கிறது. தினசரி சம்பிரதாய விசாரணைகளைத் தவிர உருப்படியான கள நகர்வுகள் எதுவும் வெளிப்படையாகத் தெரியவில்லை. இதனால், “குழந்தை உயிருடன் இருக்கிறாளா?” என்ற அடிப்படை கேள்விக்குக் கூடப் பதிலின்றி, வழக்கை மெல்லக் கிடப்பில் போடப் பார்க்கிறார்களா என்ற கடுமையான சந்தேகமும் கொந்தளிப்பும் பொதுமக்கள் மற்றும் சமூக ஆர்வலர்களிடையே எழுந்துள்ளது.
ஆரம்பத்தில் உள்ளூர் போலீசார் குற்ற நடந்த இடத்தைப் பாதுகாக்காமல் விட்ட அலட்சியமே இத்தனை குளறுபடிகளுக்குக் காரணம் என்று கூறப்படுகிறது. நள்ளிரவுப் பணம் பரிமாற்றம் மற்றும் அரசியல் செல்வாக்கு உள்ளவர்களின் தொடர்புகள் வழக்கில் அடிபட்ட நிலையில், அவர்கள் மீது உறுதியான நடவடிக்கை பாயாமல் தடுத்து நிறுத்தப்படுகிறதா என்ற கேள்விகளும் வலுத்து வருகின்றன. “எங்களுக்கு வேறு எதுவும் வேண்டாம், குழந்தையை மீட்டுத் தந்தால் போதும்” என்று தாய் பவானி தொடர்ந்து கண்ணீர் மல்கக் கதறிவரும் வேளையில், அரசின் மௌனம் மக்களின் கோபத்தை மேலும் அதிகரித்து வருகிறது.
விசாரணை என்ற பெயரில் நாட்களைக் கடத்துவதும், திசை தெரியாமல் முட்டுச்சந்தில் நிற்பதும் அந்தப் பச்சிளம் குழந்தைக்கு இழைக்கப்படும் மன்னிக்க முடியாத அநீதியாகும். எனவே, சிபிசிஐடி தனது மெத்தனத்தைக் கைவிட்டு, வழக்கில் ஒளிவுமறைவின்றி வெளிப்படையான உண்மைகளை நாட்டு மக்களுக்கு அறிவிக்க வேண்டும். இல்லையேல், பாதிக்கப்பட்ட குடும்பத்திற்கு நீதி வழங்கும் வகையில் இந்த வழக்கை உடனடியாக முழுமையாக சிபிஐ (CBI) வசம் ஒப்படைக்க வேண்டும் என்பதே ஒட்டுமொத்த மக்களின் ஒரே குரலாக உள்ளது.