கர்நாடக மாநிலம் உடுப்பியைச் சேர்ந்த ஆல்வின் பிரகாஷ் குந்தர் என்பவர் கடந்த 14 ஆண்டுகளாக ஐக்கிய அரபு அமீரகத்தில் உள்ள சாரஜா விமான நிலையத்தில் பணியாற்றி வந்துள்ளார். இவருக்கு டீனா என்ற மனைவியும், 10-ஆம் வகுப்பு படிக்கும் ஒரு மகனும் உள்ளனர்.
கடந்த ஜூலை 20 அன்று பிரகாஷை அவரது தம்பி போனில் தொடர்பு கொள்ள முயன்றபோது, அவர் போனை எடுக்காமல் மெசேஜ் மட்டும் வந்துள்ளது. இதனால் சந்தேகமடைந்த குடும்பத்தினர் விசாரணையில் இறங்கியபோது, பிரகாஷ் காணாமல் போனது தெரியவந்தது. இதைத் தொடர்ந்து நடத்தப்பட்ட அதிரடி விசாரணையில், ஓமன் செல்லும் வழியில் நின்றிருந்த ஒரு காரில் இரண்டு பைகளில் 9 துண்டுகளாக வெட்டி அடைக்கப்பட்ட நிலையில் பிரகாஷின் உடல் பாகங்கள் கைப்பற்றப்பட்டன. டிஎன்ஏ பரிசோதனையில் அது பிரகாஷின் உடல் தான் என்பது உறுதி செய்யப்பட்டது.
இக்கொடூரச் சம்பவத்திற்குப் பிறகு சாரஜாவில் இருந்த அவரது மனைவி டீனா மற்றும் மகன் இருவரும் மாயமாகியுள்ளனர். மனைவியே இக்கொலையைச் செய்துவிட்டு இந்தியாவுக்குத் தப்பி வந்திருக்கலாம் எனப் பிரகாஷின் தம்பி உடுப்பி மாவட்ட காவல் கண்காணிப்பாளரிடம் புகார் அளித்துள்ளார். இச்சம்பவம் தொடர்பாக சர்வதேச போலிஸார் மற்றும் தூதரக அதிகாரிகள் மூலம் தீவிர விசாரணை நடத்தப்பட்டு வருகிறது.