தஞ்சாவூரில் தனியார் பள்ளி ஆசிரியர் ஒருவர் ஆன்லைன் வர்த்தகத்தில் அதிக லாபம் கிடைக்கும் என்ற ஆசை வார்த்தையை நம்பி, ரூ.57 லட்சத்து 45 ஆயிரத்தை இழந்து சைபர் கிரைம் போலீஸில் புகார் அளித்துள்ள சம்பவம் பெரும் அதிர்ச்சியை ஏற்படுத்தியுள்ளது. கடந்த செப்டம்பர் 21-ஆம் தேதி அவரது ஃபேஸ்புக் மற்றும் வாட்ஸ்அப்பிற்கு வந்த குறுந்தகவலைத் தொடர்ந்து, மர்ம நபர் ஒருவர் ஆன்லைன் முதலீட்டுத் திட்டம் குறித்துக் கூறி ஆசை காட்டியுள்ளார். இதனை நம்பிய ஆசிரியர், அந்த நபர் குறிப்பிட்ட பல்வேறு வங்கிக் கணக்குகளுக்கு 11 தவணைகளாகத் தன் சேமிப்புப் பணத்தை ஆன்லைன் மூலம் அனுப்பியுள்ளார். ஆனால், கூறியபடி எந்த லாபமும் வராததுடன், அந்த நபரின் செல்போன் எண்ணும் சுவிட்ச் ஆஃப் செய்யப்பட்டிருந்ததைத் தொடர்ந்தே தான் ஏமாற்றப்பட்டதை அவர் உணர்ந்துள்ளார்.
இந்த மோசடி குறித்து ஆசிரியர் அளித்த புகாரின் அடிப்படையில், தஞ்சை சைபர் கிரைம் போலீசார் உடனடியாக வழக்குப்பதிவு செய்து தீவிர விசாரணை நடத்தி வருகின்றனர். முதற்கட்ட விசாரணையில், ஆசிரியர் பணம் அனுப்பிய வங்கிக் கணக்குகள் மத்தியப் பிரதேசம், ராஜஸ்தான், மேற்கு வங்கம், உத்தரப் பிரதேசம், கர்நாடகா மற்றும் மகாராஷ்டிரா உள்ளிட்ட பல்வேறு மாநிலங்களைச் சேர்ந்தவை என்பது தெரியவந்துள்ளது. ஆன்லைன் வர்த்தகத்தில் எளிதில் பணம் ஈட்டலாம் என்ற பொய்யான வாக்குறுதிகளை நம்பி பொதுமக்கள் யாரும் தங்களது கடின உழைப்புப் பணத்தை இழக்க வேண்டாம் என்றும், இதுபோன்ற சைபர் குற்றங்கள் குறித்து எச்சரிக்கையுடன் இருக்க வேண்டும் என்றும் காவல்துறையினர் மீண்டும் மீண்டும் விழிப்புணர்வு ஏற்படுத்தி வருகின்றனர்.