உத்தரப் பிரதேச மாநிலத்தில், தனது காதலியை நேரில் சந்திப்பதற்காக நள்ளிரவில் அவரது இல்லத்திற்குச் சென்ற 19 வயது இளைஞரான சிவபிரசாத் என்பவர், பெண்ணின் குடும்பத்தினரால் கொடூரமாக அடித்துக் கொலை செய்யப்பட்டுள்ளார். நள்ளிரவு நேரத்தில் காதலியின் அறையில் இருவரும் பேசிக்கொண்டிருந்தபோது, அங்கு வந்த பெண்ணின் தந்தை ராகேஷ் ராஜ்புத் மற்றும் அவரது உறவினர்கள் தங்களது மகளுடன் சிவபிரசாத் இருப்பதைப் பார்த்து ஆத்திரமடைந்துள்ளனர். இதனால் கோபத்தின் உச்சிக்குச் சென்ற அவர்கள், அந்த இளைஞரைத் மரக்கட்டைகளாலும் கால்களாலும் சரமாரியாகத் தாக்கத் தொடங்கியுள்ளனர். அப்போது தனது காதலனைக் காப்பாற்றப் போராடிய அந்த இளம்பெண்ணையும் அவர்கள் இரக்கமின்றித் தாக்கியதில், அவர் பலத்த காயமடைந்துள்ளார்.
இந்தக் கொடூரத் தாக்குதலுக்கு இடையே உயிருக்குப் போராடிக் கொண்டிருந்த சிவபிரசாத், நள்ளிரவு 12 மணியளவில் தனது தாயாருக்குத் தொலைபேசி வாயிலாகத் தொடர்பு கொண்டு, “அம்மா சீக்கிரம் வாருங்கள், என்னை இவர்கள் அடித்துக் கொன்றுவிடுவார்கள்” எனத் தன் கடைசி வார்த்தைகளைக் கூறி கதறியுள்ளார். பதறிப்போன அவரது தாய் உடனடியாக உறவினர்களுக்குத் தகவல் கொடுத்து, அவர்கள் சம்பவ இடத்திற்கு விரைந்து வந்து சிவபிரசாத்தை மீட்டனர். எனினும், பலத்த காயமடைந்த அந்த இளைஞரை மருத்துவமனைக்குக் கொண்டு செல்லும் வழியிலேயே அவர் பரிதாபமாக உயிரிழந்தார். இச்சம்பவம் குறித்து வழக்குப் பதிவு செய்துள்ள உள்ளூர் காவல்துறையினர், கொலையாளிகளைத் தீவிரமாகத் தேடி வருகின்றனர்.