தமிழக பாஜக தலைவர் நயினார் நாகேந்திரன், சென்னை கிண்டியில் உள்ள ஆளுநர் மாளிகையில் தமிழக ஆளுநர் (பொறுப்பு) ராஜேந்திர அர்லேகரை நேரில் சந்தித்து தவெக அரசுக்கு எதிராக அதிரடி புகார் மனு ஒன்றை அளித்துள்ளார். இந்த சந்திப்புக்கு முன்னதாக, தனது எக்ஸ் (ட்விட்டர்) பக்கத்தில் தவெக அரசின் மீதான குற்றச்சாட்டுகளைப் பட்டியலிட்டிருந்த அவர், “ஆரம்பமாகிறதா தூயசக்தியின் ஊழல் வேட்டை?” என்ற கேள்வியோடு ஆளும் அரசுக்கு எதிராகக் கடுமையான விமர்சனங்களை முன்வைத்திருந்தார். தவெக அரசு பொறுப்பேற்ற பிறகு பாஜக தரப்பில் இருந்து ஆளுநரிடம் அளிக்கப்பட்டுள்ள இந்த முறையான புகார், தற்போதைய தமிழக அரசியல் களத்தில் பெரும் பரபரப்பை ஏற்படுத்தியுள்ளது.
அரசு உதவிப்பேராசிரியர் தேர்வு மற்றும் அரசு வழக்கறிஞர்கள் நியமனம் ஆகியவற்றில் தவெக அரசு பல்வேறு முறைகேடுகளில் ஈடுபட்டுள்ளதாக நயினார் நாகேந்திரன் தனது புகாரில் பிரதானமாகச் சுட்டிக்காட்டியுள்ளார். தவெக ஆட்சியில் லஞ்சத்தின் அடிப்படையில்தான் அரசு வழக்கறிஞர்களின் நியமனங்கள் நடப்பதாக அந்தக் கட்சியைச் சேர்ந்த வழக்கறிஞர் ஒருவரே புகார் அளித்துள்ளதை அவர் நினைவுகூர்ந்துள்ளார். அதுமட்டுமின்றி, அரசு சார்பில் நடத்தப்பட்ட உதவிப்பேராசிரியர்களுக்கான தேர்வில், 2006-இல் பிறந்த ஒரு நபரும், பெயரே குறிப்பிடப்படாத ஒரு நபரும் தேர்ச்சிப் பட்டியலில் இடம் பெற்றிருப்பதாக வெளியாகியுள்ள குளறுபடிகள், அரசு வேலைகளை ஆளும் தரப்பு தங்களுக்கு சாதகமாக ஆட்டிப்படைப்பதைக் காட்டுவதாகக் கண்டனம் தெரிவித்துள்ளார்.
தேர்தல் களத்தில் “நாங்களும் ஊழல் செய்ய மாட்டோம், செய்பவர்களையும் விட மாட்டோம்” என்று முழங்கிய தவெக தலைவர் விஜய், முதல்வராகப் பொறுப்பேற்றதில் இருந்து எங்கு திரும்பினாலும் ஊழல்களும் முறைகேடுகளும் மட்டுமே கொடிகட்டிப் பறப்பதாக பாஜக சாடியுள்ளது. தவெகவினரின் மாமூல் அராஜகம், டெண்டர் விடுவதில் முறைகேடு, வேண்டியவர்களுக்கு அரசு பதவிகளை வாரி வழங்குவது போன்ற செயல்களால், அரசு வேலையை நம்பி பல கனவுகளுடன் காத்துக்கிடக்கும் லட்சக்கணக்கான பட்டதாரி இளைஞர்களின் நம்பிக்கைகள் சுக்குநூறாக உடைந்துள்ளதாக நயினார் நாகேந்திரன் குற்றம்சாட்டியுள்ளார். எனவே, முதல்வர் ஜோசப் விஜய் உடனடியாக இந்த விவகாரத்தில் தலையிட்டு, அதிகாரத்தைப் பயன்படுத்தி அரசு வேலைகளை விலை பேசுபவர்கள் மீது கடும் நடவடிக்கை எடுக்க வேண்டும் என்றும் அவர் வலியுறுத்தியுள்ளார்.
இத்தகைய கடுமையான விமர்சனங்கள் ஒருபுறமிருக்க, மறுபுறம் தமிழகத்தில் தவெக அரசு பொறுப்பேற்ற நாள் முதல் பல்வேறு அதிரடி நடவடிக்கைகளை மேற்கொண்டு வருகிறது என்பதும் குறிப்பிடத்தக்கது. முதல்வர் விஜய்யின் முதன்மைக் குறிக்கோளே ஊழலை ஒழிப்பதுதான் என்பதால், கடந்த காலங்களில் நிலவிய தமிழகத்தின் ஒட்டுமொத்த நிதிநிலை மற்றும் மின்சார வாரியத்தின் கடன் சுமை குறித்து அரசு தரப்பில் வெள்ளை அறிக்கை வெளியிடப்பட்டிருந்தது. மேலும், நிர்வாகத்தைச் சீரமைக்கப் பல்வேறு அரசு அலுவலகங்களில் அமைச்சர்களும், எம்எல்ஏக்களும் தொடர்ந்து திடீர் ஆய்வுகளை நடத்தி வரும் சூழலில், தனியார் பள்ளிகளில் கட்டண விவரங்களை நோட்டீஸ் போர்டில் வெளிப்படையாக ஒட்ட வேண்டும் என பள்ளிக் கல்வித் துறை அமைச்சர் ராஜ்மோகன் உத்தரவிட்டிருப்பது போன்ற மக்கள் நலத்திட்டங்களும் செயல்பாடுகளும் மக்கள் மத்தியில் வரவேற்பைப் பெற்று வருகின்றன.