இந்திய இளம் கிரிக்கெட் நட்சத்திரமான வைபவ் சூர்யவன்சியின் அதிரடியான பேட்டிங் முறை, அவரது மணிக்கட்டு மற்றும் உடலமைப்பில் நீண்ட கால அடிப்படையில் மோசமான காயங்களை ஏற்படுத்தக்கூடும் என்று தென்னாப்பிரிக்க அணியின் முன்னாள் ஜாம்பவான் டேரில் கலினன் எச்சரித்துள்ளார். 15 வயதே ஆன வைபவ் சூர்யவன்சி, பந்துகளை எதிர்கொள்ளும்போது தனது பேட்டை அதிவேகமாக சுழற்றி பவர்-ஹிட்டிங் முறையில் விளையாடி வருகிறார். இந்த வயதில் இவ்வளவு கனமான பேட்டைப் பயன்படுத்தி, தொடர்ச்சியாக அதிகப்படியான கிரிக்கெட் போட்டிகளில் விளையாடுவது அவரது மணிக்கட்டு, முழங்கை மற்றும் மூட்டுகளுக்குப் பெரிய அழுத்தத்தை உருவாக்கும் என்று கலினன் தனது கவலையை வெளிப்படுத்தியுள்ளார்.
சச்சின் டெண்டுல்கரின் ஆரம்பகால வாழ்க்கையோடு வைபவ் சூர்யவன்சியை ஒப்பிட்டுப் பேசிய கலினன், சச்சின் தனது 24 ஆண்டுகால கிரிக்கெட் வாழ்க்கையில் பலமுறை காயங்களைச் சந்தித்தாலும், 2004-ல் ஏற்பட்ட ‘டென்னிஸ் எல்போ’ என்ற முழங்கைக் காயம் அவரது ஒட்டுமொத்த வாழ்க்கையையே முடிவுக்குக் கொண்டுவரும் அளவுக்கு அச்சுறுத்தியதை நினைவூட்டியுள்ளார். சச்சின் கூட தனது இளம் வயதில் சூர்யவன்சியைப் போல இவ்வளவு வேகமாக, இத்தனை முறை பேட்டை சுழற்றி விளையாடியதில்லை என்றும் அவர் குறிப்பிட்டுள்ளார்.
இன்றைய நவீன கிரிக்கெட்டில் வீரர்கள் முந்தைய தலைமுறையினரை விட அதிக எடைகொண்ட பேட்டுகளைப் பயன்படுத்துகின்றனர். மேலும் தொடர்ச்சியான சர்வதேசப் போட்டிகள் மற்றும் ஐபிஎல் போன்ற லீக் தொடர்களால் வீரர்களின் பணிச்சுமை அதிகமாக உள்ளது. வைபவ் சூர்யவன்சி இன்னும் வளரும் பருவத்தில் இருப்பதால், அவரது தசைநார்கள் மற்றும் மூட்டுகள் இந்த தீவிரமான பேட்டிங் முறையைத் தாங்குவது கடினம் என்றும், முறையான உடற்தகுதி மற்றும் பணிச்சுமை நிர்வாகம் இல்லாவிட்டால் இது அவரது எதிர்கால வாழ்க்கையைப் பாதிக்கலாம் என்றும் கலினன் அறிவுறுத்தியுள்ளார்.